'ქურდული' სიმბოლო ახალციხის სკოლის კედელზე

რვაქიმიანი ვარსკვლავი კრიმინალური მენტალიტეტის სიმბოლოდ ითვლება. ვინ ან რატომ გამოსახა ეს სიმბოლო საჯარო სკოლის კედელზე, უცნობია.

მე–5 სკოლის დირექტორის, ინგა ვარდიძის განმარტებით, სანამ ღობის კედელს მოხსნიდნენ, სკოლის შენობაზე ვარსკვლავი გამოსახული არ იყო. დირექტორი ვარაუდობს, რომ ის ღობის მოხსნის შემდეგ მიახატეს: „ახლა უბრალოდ ღიაა, სარემონტო სამუშაოები მიმდინარეობს და შესაძლებელია, კედლის მოხსნის შემდეგ დახატეს“.

რვაქიმიანი ვარსკვალავის – ოქტაგრამის არაერთი ვარიაცია არსებობს და მისი სიმბოლური დატვირთვაც სხვადასხვა კულტურაში განსხვავებულია. წინარე ქრისტიანულ სამყაროში, რვაქიმიანი ვარსკვლავი ზოგადად განასახიერებდა ახლის დასაწყისს. ბაბილონელებისათვის ქალღმერთ იშთარს წარმოადგენდა, რომლეიც დაკავშირებული იყო პლანეტა ვენერასთან; ინდუსებისთვის –ქალღმერთ ლაკშიმს; ეგვიპტელებისთვის – რვა ღვთაებას.

წინარე ქრისტიანული ინტერპრეტაციით, ოქტაგრამის თითოეული წერტილი ქიმებისა მიუთითებს ოთხ კარდინალურ მიმართულებას და ოთხ სტიქიას: ჰაერს, წყალს, მიწას, ცეცხლს. ოქტაგრამის ოთხიმთავარი წვერი გვიჩვენებს ამ სტიქიების დადებით ასპექტებს, ხოლო სხვა წვერები – უარყოფითს.

საბჭოთა კავშირის პერიოდიდან, რვაქიმიანი ვარსკვლავი კრიმინალური სამყაროს სიმბოლოდ იქცა. მისი წარმომადგენლები ასეთ ვარსკვლავს, ყველაზე ხშირად, მკერდსა და მუხლებზე იხატავენ. მუხლებზე დახატული ასეთი ვარსკვლავის მნიშვნელობას ასე ხსნიან – „არ დავდგები მუხლებზე ხელისუფლების წინაშე“, ხოლო, როცა რვაქიმიანი ვარსკვლავი მხრებზეა გამოსახული, აღნიშნავს წოდებას – „ქურდი“ (კანონიერი ქურდი).

ძალზე საეჭვოა, რომ N5 საჯარო სკოლის კედელზე მიხატული რვაქიმიანი ვარსკვლავი ბაბილონურ ან ეგვიპტურ სიმბოლიკას გამოსახავდეს.



[თორნიკე ზაზაძე, ახალციხე]