‘როგორ დავიცვათ ჰიგიენის ნორმები, დღის განმავლობაში უწყლოდ ვართ’ - რაბათის მცხოვრებლები

რაბათში, ხარისჭირაშვილის ქუჩაზე მცხოვრებლების თქმით, უკვე ერთი თვეა, ყოველ დღე შვიდი საათის განმავლობაში წყალი წყდება: “როგორ დავიცვათ ჰიგიენის ნორმები, როდესაც ახალციხეში ხარისჭირაშვილის ქუჩაზე დილით 11:00 საათზე რომ შეწყდება, საღამოს 6 ან 7 საათამდე წყალი არ გვაქვს. თუ გასული ხარ და ათ ან თერთმეტ საათამდე ვერ მოასწარი აღება, მთელი დღე ვართ უწყლოდ“, - აცხადებს ამ ქუჩაზე მცხოვრები ერთ-ერთი ადგილობრივი „სამხრეთის კარიბჭესთან“.

მისივე თქმით, წყლის მიწოდების განრიგი გაზაფხულის დადგომასთან ერთად შეიცვალა, ქუჩაზე მცხოვრებლები ზამთარში წყალს უწყვეტად იღებდნენ: „გაზაფხულდა და ახლა საღამომდე არაა ხოლმე, ხან მთელი ღამე მოდის, ხან წყდება. თუ ეკონომიის მიზნით გვითიშავენ, იქნებ ღამე ათისთვის გათიშონ და დღე მოგვცენ. დავიტანჯეთ გასულ ზაფხულსაც ასე იყო“.

„გაერთიანებული წყალმომარაგების“ სერვის-ცენტრში აცხადებენ, რომ ხარისჭირაშვილის ქუჩაზე წყლის მიწოდების განრიგი ნამდვილად შეიცვალა. მათი თქმით, ამისი მიზეზი მოხმარების სიხშირე გახდა.

„სეზონურად, მოხმარების მიხედვით ყველაფერი იცვლება. 24 საათიანზე იყვნენ, მაგრამ ზამთარში მოხმარება იყო ნაკლები, ახლა გაზაფხულზე მოხმარება გაიზარდა. ახლა სისტემა არ გვაძლევს იმის საშუალებას. ზაფხულში უფრო შემცირდება მიწოდება, იმიტომ, რომ ახლა რასაც მოიხმარს ადამიანი, ზაფხულში ორჯერ მეტს მოიხმარს. შესაბამისად, განრიგი კიდევ შეიცვლება“, - ამბობს „გაერთიანებული წყალმომარაგების კომპანიის“, ახალციხის სერვის ცენტრის ხელმძღვანელი გიორგი გოგოლაური.

მისივე განმარტებით, თუ აბონენტებს განრიგის ცვლილებასთან დაკავშირებით კითხვები აქვთ, სერვის ცენტრს ინდივიდუალურად უნდა მიმართონ: „მოგვმართოს თავად აბონენტმა და ავუხსნით რატომ იყო 24 საათიანი განრიგი აქამდე და რატომ არ აქვთ ახლა ასე“.

ახალციხის რამდენ ქუჩაზე მოხდა წყლის განრიგის ცვლილება, გოგოლაური ვერ აკონრეტებს.

[თაკო ფეიქრიშვილი, ახალციხე]