„შესაძლოა უნივერსიტეტი პარალიზებული აღმოჩნდეს“

გარდა ამისა, ასანაძრაურებელია პერსონალის ხელფასიც.უნივერსიტეტის ასზე მეტი თანამშრომელი თითქმის ერთი თვეა კუთვნილი ხელფასის მიღებას ელის.

„წარდგენილ ბიუჯეტზე გვითხრეს რომ არასწორია და შესწორებების შეტანა მოგვიხდა. რადგან დეკემბრის თვის ბიუჯეტს ვაკეთებდით, უნდა ყოფილიყო წარმოდგენილი ნოემბერ-დეკემბერში მისაღები თანხა, მაგრამ მოგვთხოვეს ორივე, ახალქალაქისა და ახალციხის სასწავლებლის წლიური ბიუჯეტის ერთად წარდგენა“, - ამბობს სამცხე-ჯავახეთის სახელმწიფო სასწავლო უნივერსიტეტის რექტორის მოვალეობის შემსრულებელი თინა გელაშვილი.

მისი თქმით, ახალციხის სასწავლებლის წარდგენილი ბიუჯეტი 16,000, ახალქალაქისა კი 18,350 ლარი იყო. ნაცვლად აღნიშნული თანხის ჯამისა, რეორგანიზაციის შემდგომ უნივერსიტეტს წლიური ანგარიში უნდა ეჩვენებინა: „წლიური დაფინანსება ახალქალაქის სასწავლებელს 100,000 და ახალციხის უნივერსიტეტსაც 100,000 ჰქონდა. ეს კორექიტრება შევიტანეთ და ახლა ველოდებით მის ხელმოწერას“.

გელაშვილის განცხადებით, კორექტირებული ბიუჯეტი უკვე ყველა შესაბამისმა სტრუქტურამ და საბიუჯეტო რგოლმა გაიარა: „ახლა ბიუჯეტი რეგენტთა საბჭომ უნდა დაამტკიცოს და შემდგომ ხელი განათლების მინისტრის პირველმა მოადგილემ უნდა მოაწეროს, რომელიც ამჟამად მივლინებით ამერიკაში იმყოფება“.

განათლების მინისტრის მოადგილე თამარ სანიკიძე საქართველოში 21 დეკემბერს ბრუნდება.

„დამპირდნენ, რომ პარასკევს, მისი დაბრუნებისთანავე, ხელი მოეწერება ბიუჯეტს და იმ დღესვე დასკანერებულ ვერსიას გადმოგვიგზავნიან“, - ამბობს გელაშვილი.

მისივე თქმით, თუ ბიუჯეტს ხელი პარასკევს მოეწერა ,შაბათს უკვე ხელფასების გაცემა შესაძლებელი იქნება. მაგრამ იმ შემთხვევაში, თუ ეს პროცესი დროში კვლავ გაჭიანურდება, უნივერსიტეტის პარალიზების საფრთხე დგება. კომუნალური გადასახადების გადაუხდელობის გამო სასწავლებელს დენი, ინტერნეტი, წყალი და გაზი გაეთიშება.

„კერძო მოლაპარაკებებით გადავავადებინეთ გადასახადები. გვეუბნებიან, რომ შუქს ჩაგვიჭრიან, შუქი რომ გაითიშოს, მასზეა მიბმული გათბობა და ინტერნეტიც. ასე რომ, უნივერსიტეტი პარალიზებული გახდება და მძიმე მდგომარეობაში აღმოვჩნდებით“, - გვითხრა გელაშვილმა.

შეგახსენებთ, რომ ეს პრობლემები უნივერსიტეტში რეორგანიზაციის შემდეგ დაიწყო.

[თამუნა უჩიძე, ახალციხე]