კევინ ტუიტი

დაბადების ადგილი: საუთ-ბენდი, აშშ.

ამერიკელი ქართველოლოგი, ენათმეცნიერი და ეთნოლოგი. პროფესორი. ქართულ ენას სწავლობდა ჯერ ჩიკაგოს უნივერსიტეტში პროფესორ ჰ. ი. არონსონთან, შემდეგ - 1985-1986წწ. - თბილისის სახელმწიფო უნივერსიტეტში; დოქტორის სამეცნიერო ხარისხი მიენიჭა 1988 წელს. მუშაობს მონრეალის უნივერსიტეტში (კანადა), ანთროპოლოგიის განყოფილებაში. გამოქვეყნებული აქვს მონოგრაფია: "Kartvelian Morphosyntax. Number Agreement and Morphosyntactic Orientation in the South Caucasian Languages" (ქართველური მორფოსინტაქსი. შეთანხმება რიცხვში და მორფოსინტაქსური ორიენტაცია სამხრეთკავკასიურ ენებში), LINCOM Europa. München, 1998. 1980-იანი წლებიდან ინტენსიურად აქვეყნებს სტატიებს ქართველურ ენათა გრამატიკის საკითხებზე, მათ შორის განსაკუთრებით აღსანიშნავია "ირიბი გარდამავალი ზმნები ქართულში", 1987; "ქართული -ყე-ს გეოგრაფია", 1989; "პრეფიქსი ხ ძველ (ადრინდელ) ქართულში" 1990; "რიცხვის კატეგორია საერთო-ქართველურში", 1992; "სვანური ატელიკური ზმნების აორისტი და ფსევდო-აორისტი", 1994; "პარადიგმების აღდგენა ქართულში", 1996; "სვანური ენა", 1997; "შენიშვნა სვანურ ზმნაზე", 1998; "დეპონენსური ზმნები ქართულში", 2002; "ქართველური სერიების ნიშნები", 2003. ავტორია საენციკლოპედიო სტატიისა: "Early Georgian (ძველი ადრეული ქართული), წიგნში: The Cambridge Encyclopaedia of the World, s Ancient Languages (ed. by Roger D. Woodward, CUP (Cambridge University Press), გვ. 967-987. ამასთანავე იგი ნაყოფიერ მუშაობას ეწევა ქართული ხალხური პოეზიის პოპულარიზაციაში: მან თარგმნა და გამოსცა ანთოლოგია, რომელშიც შესულია 70-მდე ნიმუში ქართული ტექსტის ინგლისური ტრანსლიტერაციითურთ - "An Anthology of Georgian Folk Poetry" (ქართული ხალხური პოეზიის ანთოლოგია) (I გამოც. 1994, II-2005).

წყარო: ქართული ენა: ენციკლოპედია. - თბ. 2008. - გვ.461-462

• სვანური ენის სტრუქტურის საკითხები : [მონოგრაფია]/მედეა საღლიანი (რედაქტორი). - თბილისი, თსუ არნ. ჩიქობავას სახ. ენათმეცნიერების ინ-ტი., 2016. - 936გვ. . - ISBN: 9789941463808
• ქართველური ლექსიკის ისტორიიდან : [დამხმარე სახელმძღვანელო]. 1/იზა ჩანტლაძე (რედაქტორი). - თბილისი; ბათუმი; ახალციხე, გლობალ-პრინტი+, 2012. - 327გვ. . - ISBN: 9789941932809