ბერძენი გრამატიკოსისა და პოეტის – პართენიოს ნიკეელის Παρθένιος ὁ Νικαεύς – შესახებ ცნობები მწირია და დაუზუსტებელი. ძველი და ახალი წელთაღრიცხვების მიჯნაზე მოღვაწე პართენიოსის შესახებ სვიდას ლექსიკონში რამდენიმე წინადადებაა: „პართენიოსი, ძე ჰერაკლიდესა და ევდორასი (ჰერმიპოსი მას ტეთასად მოიხსენიებს), ნიკეადან ან მირლეადან, ელეგიკოსი და ასევე სხვა მეტრული საზომებით შემოქმედი. რომაელების მიერ მითრიდატეს დამარცხების შემდეგ ის მძევლად აიყვანა ცინამ. თუმცა გაათავისუფლეს იმის გამო, რომ იყო სწავლული. ცხოვრობდა ტიბერიუსის ხანამდე. დაწერა ელეგიები: „აფროდიტე“, „არეტე“ – ცოლის დასატირებელი, ენკომიონი არეტესადმი სამ წიგნად და მრავალი სხვა“. პართენიოსის ბიოგრაფიის შესახებ სვიდას ლექსიკონში არსებული და სხვა მონაცემების მიხედვით მისი რომში ჩამოსვლის, იქ მოღვაწეობისა და გარდაცვალების სავარაუდო თარიღები შეგვიძლია დავასახელოთ: ძვ.წ 73 წელს დაიწყო მესამე მითრიდატული ომი, რახან ვიცით, რომ პართენიოსი რომში სწორედ ამ დროს ჩაიყვანეს, სავარაუდო თარიღად ძვ.წ 73 ან 72 წელი სახელდება. დაბადების თარიღზე არც ერთი წყარო არ მიუთითებს და, შესაბამისად, ვერ ვიმსჯელებთ, მეტიც, პართენიოსზე არსებულ, ჩვენ მიერ მოძიებულ, თითქმის არც ერთ გამოკვლევაში მისი დაბადების თარიღის შესახებ საუბარი არაა.