სამშობიარო სახლი, სადაც ახალშობილები აერიათ, პასუხს აგებს

იტალიის ქალაქ ბრეშას სამშობიარო სახლს, ახალნამშობიარები ქალი და მისი ოჯახი უჩივის. საქმე იმაში გახლავთ, რომ სამედიცინო პერსონალს, ორი ახალშობილი გოგონა ერთმანეთში აერიათ და ქალი მთელი დღის განმავლობაში სხვის შვილს კვებავდა და უვლიდა.

"დაახლოებით ღამის ორ საათზე ვიმშობიარე. მშობიარობის შემდეგ ახალშობილი ბავშვთა განყოფილებაში გადაიყვანეს, მე კი სამშობიარო ბლოკში დავრჩი, რადგან პალატაში გადასასვლელად, კოვიდტესტის პასუხს უნდა დავლოდებოდი. მეორე დილით ბავშვი მოვიკითხე და ცოტა ხანში მართლაც მომიყვანეს. მთელი დღის განმავლობაში მე მყავდა, გამოვკვებე, ჩემი ოჯახის წევრებს მისი ფოტოები გავუგზავნე," - იხსენებს ქალი.

პირველი, ვისაც ეჭვი შეეპარა, რომ ბავშვი, რომელიც დედას მიუყვანეს, სხვა ახალშობილი იყო, ბავშვის მამა გახლდათ. ის დარწმუნებით იმეორებდა, რომ მშობიარობისას სხვა ბავშვი ნახა. ეჭვი იმანაც გაამძაფრა, რომ ჩვილს ხელზე საიდენტიფიკაციო სამაჯური არ ეკეთა. სამაჯური ბავშვის ლოგინში იპოვეს, მაგრამ მასზე სხვა სახელი და გვარი ეწერა. საბოლოოდ გაირკვა, რომ ახალშობილები მართლაც პერსონალს აერია, რის შემდეგაც დედას თავისი ნამდვილი შვილი მიუყვანეს.

აღნიშნული ფაქტი გასული წლის ოქტომბერში მოხდა, მაგრამ მშობლებმა გადაწყვიტეს მორალური ზიანის გამო, კლინიკას უჩივლონ. ქალი ამბობს, რომ იმ დღის შემდეგ, თავის ნამდვილ შვილთან დედაშვილურ კავშირს ვერ ამყარებს და ბავშვთან ურთიერთობის პრობლემა აქვს. კლინიკის დირექცია შეცდომას არ უარყოფს და პასუხისმგებლობას თავს არ არიდებს. მეორე ჩვილის მშობლები კლინიკას არ უჩივიან.