გაგუას კლინიკა

დილის ავადმყოფობა

ორსულობა  სასიამოვნო სიახლეა, თუმცა მას თან ახლავს გარკვეული უსიამოვნო შეგრძნებები,  როგორიცაა „დილის ავადმყოფობა“ - ორსულობის პირველ ტრიმესტრში განვითარებული გულისრევა და ღებინება.

ჩვენი სტატია დაგეხმარებათ გაიგოთ თუ რატომ ხართ ცუდად, რამდენი ხანი შეიძლება გაგრძელდეს თქვენი „დილის ავადმყოფობა“ და რით შეიძლება უშველოთ თავს ამ დროს.

„დილის ავადმყოფობის“ გამომწვევი მიზეზი დედის ორგანიზმში არსებული ჰორმონული ცვლილებებია. ამ პროცესს ძირითადად ორი ჰორმონი წარმართავს, რომელთა რაოდენობაც ორსულობის დასაწყისში განსაკუთრებულად იმატებს. ეს ჰორმონებია ადამიანის ქორიონალური გონადოტროპინი (hCG), რომელიც გამოიყოფა განაყოფიერებული კვერცხუჯრედიდან და უზრუნველყოფს პლაცენტის ზრდას, და ესტროგენი, რომელიც უზრუნველყოფს სანაყოფე გარსების და თავად ნაყოფის განვითარებას. აღნიშნული ჰორმონების გაძლიერებული წარმოქმნა საჭიროა პლაცენტის სრულყოფილი ჩამოყალიბებისთვის და ნაყოფის განვითარებისთვის.

იმ შემთხვევაში თუ თქვენი ორგანიზმი ვერ ეგუება ჰორმონების სწრაფ ზრდას, თქვენ შეიძლება თავი ცუდად იგრძნოთ. უსიამოვნო შეგრძნებების უკუგანვითარებას მეორე ტრიმესტრის დასაწყისიდან უნდა ელოდოთ, რადგან ამ დროს ჰორმონული ძვრები ნაკლებად ინტენსიურია, რასაც ორგანიზმი უკეთ ეგუება.

ეს ჰორმონები გავლენას ახდენს საჭმლის მომნელებელ სისტემაზეც. ამ დროს შენელებულია საკვების გადაადგილება კუჭსა და ნაწლავებში, რაც აძლიერებს უსიამოვნო სიმპტომებს. „დილის ავადმყოფობის“ განვითარების რისკი უფრო მაღალია მრავალნაყოფიან ორსულებში, რადგან ამ დროს ჰორმონები უფრო მეტი რაოდენობით წარმოიქმნება. ასევე ორსულებში, რომლებიც ელოდებიან გოგონას. შესაძლებელია, რომ მომდევნო ორსულობამ „დილის ავადმყოფობის“ გარეშე ჩაიაროს.

„დილის ავადმყოფობა“ გამოვლინდება გულისრევის შეგრძნებით ან პირღებინებით, თუმცა დედების 30%-ს საერთოდ არ აღენიშნება ეს სიმპტომები. დედების მცირე ნაწილს კი შეიძლება აღმოაჩნდეს „დილის ავადმყოფობის“ ყველაზე მძიმე ფორმა - hyperemesis gravidarum, რაც გამოიხატება, იმდენად ხშირი პირღებინებით, რომ საჭირო ხდება ორსულის ჰოსპიტალიზაცია და სათანადო მკურნალობა. მიუხედავად იმისა, რომ დაავადებას ქვია „დილის ავადმყოფობა“ დედების უმრავლესობა აღნიშნავს, რომ უსიამოვნო შეგრძნებებს დღის ნებისმიერ დროს განიცდიან, მათ შორის ღამითაც. „დილის ავადმყოფობა“ ორსულობის 6-8 კვირის ვადაზე იწყება და 14 კვირაზე მთავრდება. იშვიათად შეიძლება გაგრძელდეს მეორე და მესამე ტრიმესტრშიც.

სიმპტომების შესამსუბუქებლად შეგიძლით მარტივ ხერხებს მიმართოთ. ნატურალური სამკურნალო საშუალებები, როგორიცაა კოჭა (ჯინჯერი), ლიმონი და პიტნა შეგიძლიათ მიირთვათ ან სულაც დაყნოსოთ. მცირე ულუფებით კვება, გაღვიძებისთანავე წახემსება და მსუბუქი ვარჯიში დაგეხმარებათ თავი უკეთ იგრძნოთ. უფრო მძიმე შემთხვევებში საჭირო ხდება მედიკამენტური მკურნალობის დაწყება.