ბინის რემონტი: 10 სასარგებლო რჩევა

რემონტი - რა უნდა გავითვალისწინოთ სანამ დავიწყებთ რემონტს საკუთარ ბინაში, რა თანმიმდევრობა უნდა დავიცვათ და როგორ მოვახდინოთ დროის ეკონომია? ამ სტატიაში ჩვენ გაგიზიარებთ ჩვენს პრაქტიკულ რჩევებს.

1. განვსაზღვროთ მიზნები და ამოცანები

რემონტის საწყის წარმოადგენს იდეა! წინასწარ უნდა ვიცოდეთ და ჩამოვყალიბდეთ რა სტილის ინტერიერი გვსურს ჩვენს ბინაში (რემონტის სტილები, სტილების აღწერა და მახასიათებელი თვისებები, შესაბამისი სურათებით, შეგიძლიათ იხილოთ ჩვენს წინა სტატიებში), რა სტილის ავეჯი დაიდგმება ოთახებში - ამაზეა დამოკიდებული ელექტრო გაყვანილობის სწორი პროექტირება, ჩამრთველების და დენის წყაროების ადგილმდებარეობები.

თუ რემონტი იგეგმება სამზარეულოში, უნდა ვიცოდეთ სად დაიდგმება სამზარეულოს "საფარი", სად უნდა გავითვალისწინოთ სამაგრების ადგილი, სად უნდა გავითვალისწინოთ სავენტილაციო კომუნიკაციები და სანტექნიკური კვანძები.

2. მოსამზადებელი პერიოდი

შავი სამუშაოების ეტაპზე მხედველობიდან არ უნდა გამოგვრჩეს სხვა და სხვა მომენტი: კედლების გასუფთავება (ძველი საღებავი, შპელერი), ტიხრების-კედლების დემონტაჟი ან ახლების აგება, ფანჯრების გამოცვლა, გათბობის სისტემის დაყენება (საჭიროების შემთხვევაში), კონდიციონერის და სავენტილაციო სისტემების დაყენება, იატაკის დასაგებად საჭირო მოსამზადებელი სამუშაოების ჩატარება, ძველი სანტექნიკის დემონტაჟი, ძველი მილების ახლით ჩანაცვლება. სანამ შეუდგებით შესალეს სამუშაოებს აუცილებელია სწორედ განვსაზღვროთ სად და რა მარშრუტით მოხდება ელექტრო გაყვანილობის მონტაჟი.

3. შევამოწმოთ სიცარიელები და გავითვალისწინოთ ნარჩენების გატანა

ახალ ბინებში საჭიროა კედლებში სიცარიელების არსებობის შემოწმება. ამის ყველაზე მარტივ საშუალებას წარმოადგენს "კაკუნის" მეთოდი. კედლებში სიცარიელე შეიძლება გახდეს მიზეზი ნალესის, ან ბათქაშის შემდგომი ცვენის და ჩამოვარდნის. აუცილებლად უნდა დავიჭიროთ თადარიგი ნაგვის-ნარჩენების გატანის უზრუნველსაყოფად.

4. იატაკის დაგება

ყველა მოსამზადებელი სამუშაოს დასრულების შემდეგ ხორციელდება იატაკის დასაგებად საჭირო ზედაპირის მომზადება. კედლების სამღებრო სამუშაოების, ან შპალერის გაკვრის დაწყებამდე აუცილებელია იატაკის დასაგებად საჭირო ყველა მოსამზადებელი სამუშაოს დასრულება.

5. კედლების გასწორება

ამ ეტაპზე აუცილებელია დაანგარიშდეს რა რაოდენობის მასალა დაგჭირდებათ კედლების გასასწორებლად. იმისთვის, რომ მუშაობის პროცესში არ გამოილის სამუშაო მასალები და სამუშაოები ყველაზე შეუფერებელ დროს არ შეფერხდეს, მასალის რაოდენობის დაანგარიშება უნდა მოხდეს ზედმეტობით.

ასევე უნდა გაითვალისწინოთ შრობისთვის საჭირო დრო. ზოგიერთ შემთხვევაში, როდესაც დიდია კედელზე დატანილი მასალის სისქე, კედლიების გასაშრობად შეიძლება ჩვეულზე მეტი დრო გახდეს საჭირო (1 კვირიდან 1 თვემდე პერიოდი). იმ შემთხვევაში, თუ კედლების გასწორება სტანდარტული მეთოდებით შეუძლებელია, შეგვიძლია გამოვიყენოთ პროფილები და თაბაშირ მუყაო.

6. ფრანგული ჭერი

დგება საკითხი - რა ეტაპზე უნდა მოხდეს ფრანგული ჭერის (გასაჭიმი ჭერის) მონტაჟი. ფრანგული ჭერის მონტაჭი განეკუთვნება სუფთა სამუშაოების კატეგორიას. აქედან გამომდინარე ის სრულდება ყველა სამუშაოს ჩატარების შემდეგ, როგორც ფინალური სამუშაო.

7. საბოლოო სამუშაოები

დასასრულს ხორციელდება შემდეგი სამუშაოები: იატაკის დაგება, ღიობებში კარებების ჩაყენება, ჩამრთველების და დენის წყაროების დაყენება, ზღურბლის და პლინტუსების დაყენება, ხორციელდება სანტექნიკის მონტაჟი.

8. კარებების დაყენება

ხშირად ჩნდება კითხვა, როდის ყნდა დაყენდეს კარებები: იატაკის დაგებამდე თუ შემდეგ. დროის ეკონომიის მიზნით უმჯობესია კარებები დაყენდეს იატაკის დაგების შემდეგ. კარებების დაყყენება განეკუთნება სუფთა სამუშაოების კატეგორიას. ამით თქვენ დაიცავთ კარებებს დაბინძურებისგან და ფიზიკური დაზიანებებისგან.

იმ შემთხვევაში, თუ კარებებს დააყენებთ იაყაკის დაგებამდე, მაშინ საჭიროა გაითვალისწინოთ ის სიმალე, რა სიმაღლითაც აიწევს იატაკის ზედაპირი დაგების შემდეგ. წინააღმდეგ შემთხვევაში კარებების გაღება შეუძლებელი შეიქმნება. ამ თვალსაზრიცითაც, სპეციალისტები გვირჩევენ კარებების დაყენებას იატაკის დაგების დასრულების შემდეგ.

9. საუკეთესო დრო რემონტის დასაწყებად

იმისთვის, რომ ყველა მასალა კარგად ჩადეს ინტერიერის სივრცეში, უმჯობესია რემონტი გაკეთდეს წელიწადის თბილ პერიოდში.

10. კიდევ ერთხელ თანმიმდევრობა!

ზემოთ ნათქვამიდან გამომდინარე შეგვიძლია შევაჯამოთ რემონტის წარმოების თანმიმდევრობა:

• თავდაპირველად ვასრულებთ ელექტროობასთან დაკავშირებულ სამუშაოებს;
• შემდეგი მოდის გათბობასთან და კონდიცირებასთან დაკავშირებული სამუშაოები;
• ვამზადებთ საფუძველს იატაკისთვის;
• ვახორციელებთ ფანჯრების დემონტაჟს;
• ვამზადებთ ჭერს და კედლებს;
• ვაწარმოებთ სამღებრო სამუშაოებს (ვაკრავთ შპალერს);
• იატაკის დაგება, კარებების ჩაყენება, ზღურბლის და პლინტუსების დაყენება;
• ბოლო შტრიხს წარმოადგენ ფრანგული ჭერის მონტაჟი;