SHILLONG
Ka lympung ialehkai jong ka 2nd Meghalaya Open Table Tennis Cash Prize Tournament 2023 ka la sdang mynta ka sngi thohdieng ka 2 tarik Jylliew 2023 hapoh Laban Sports Club Indoor Hall.
Kane ka tournament ialehkai ka la sdang ha ka jingishongkun ha kaba la iohsngew ia ka sur thiang ba la rwai na ka nongrwai kaba la paw bha na ka jylla ka jong ngi, ka samla Kyntiewlin Mawphniang, kaba la pyniapbiej ia ki paidbah da ka Sur thiang kaba ka la rwai ha shuwa ban sdang kane ka tournament.
Ha kane ka sngi la ioh ia ka jingkren pdiang sngewbha na u Bah Panborlang Nongkynrih, Executive Committee Member ka Laban Sports Club, ha ryngkat ka jingiadon lang u Bah Sammy Myrthong, President ka Laban Sports Club, na ka liang jong u, u la pynpaw ka jingsngewnguh ia ki nongialehkai kiba la wan ban iadon bynta bad u la ai mynsiem ia ka klob kaba la treishitom ban pynlong ia ka Klob kaba kynsai ha ka jingialehkai Table Tennis Academy ha ka thaiñ shatei lam mihngi.
U Bah Sammy u la ong ba ka Klob ka la ai ka ia jingtyrwa ia ka sorkar ba kan pynkylla ia ka Laban Sports Club sha kawei na ki shlem ai jinghikai ialehkai Table Tennis Academy kaba kynsai bha ha ka thaiñ shatei lam mihngi. “Ka thong jong ngi ka long ban kyntiew ia kane ka jingialehkai bad ban pynlong ia kane ka jaka kum kawei na ki shlem ai jinghikai ia ka jingialehkai na bynta ki nongialehkai ba la ithuh ha ka ri (national player). Ngi don ka jingngeit ba ngin lah ban pyni shisha ia ka sap tbit ialehkai ki khynnah jong ka jylla” ong u Bah Sammy.
Ka Kong Rosetta M Kurbah (IAS), Deputy Commissioner ka East Khasi Hills, ka la long kum ka kongsan ha kane ka sngi ha kaba ka la ai ia ki kyntien ai mynsiem ia ki nongialehkai. Ka la kyntu ruh ia ki nongialehkai ba kin iai treishitom bad ba kin nym duh mynsiem ha ka jingiaid lynti jong ki. Watla ki shah kynthoh ruh hynrei ki dei ban iai treishitom shitom haduh ban da poi sha ka jingjop.
U Bah David Laitphlang, Vice-President jong ka Laban Sports Club, u la pynpaw ia ka jingsngewsarong na ka bynta kane ka klob kaba la long kum ka jingshai ia ki samla ha ka jylla “ ka Laban Sports Club ka la long kum ka rishot kaba kyrshan radbah naduh ba ki la sdang ia kane ka kynhun. Ngi la paw bad leh bha ha ka jingialehkai phutbol, kriket, hockey bad mynta ngi la sdang sa ia ka jingialehkai table tennis, ngi kyrmen ba ka lawei jong kane ka klob kan kiew shaphrang”.
Ha kane ka sngi la wan ban don lang ruh u Bah Edward Kharwanlang, uba dei u Rangbah Shnong ka Laban, uba la long ruh kum u symbud kongsan ha kane ka sngi, bad u Suresh Singh, u dkhot ba la rangbah ka Laban Sports Club, uba la ai ia ka jingkren khublei khatduh ia ki nongiashim bynta ha shuwa ban sdang kane ka lympung ialehkai kaba ar sngi.Haduh 72 ngut ki nongialehkai ki la wan ban ia shim bynta ha kane ka lympung ialehkai ha ki kyrdan bapher bapher kum ha ka Under-15 Boys’ Singles, Men’s Doubles, Under-19 Boys’ Singles, Veteran Singles (40 snem shajrong), Veteran Doubles (40 snem shajrong), Men’s Singles, bad Women’s Singles.
