SHILLONG
Ka State Level Inter School Athletic Meet kaba lai sngi ba la pynlong da ka tnat Sports bad Youth Affairs ka sorkar jylla kaba la sdang naduh mynta ka sngi ka 31 tarik Jymmang 2023 kaba la long ha ka shlem ai jinghikai ki kam ïalehkai ka jylla, katta hapoh Sports Authority of India, STC NEHU, Mawlai Umshing.
Ka Kongsan kaba la wan ban plie ïa kane ka lympung ïalehkai ka long ka kong Isawanda Laloo (IAS) Director ka tnat Sports bad Youth Affairs ka sorkar jylla bad u Working President ka Meghalaya State Olympic Association u Bah John F. Kharshiing u la long kum u Symbud kongsan ha ryngkat ka jingïadon lang ki DSO na ki distrik bapher bapher jong ka jylla.
Kane ka lympung ïalehkai kaba lai sngi kan sa poi shaba kut ha ka 2 tarik Jylliew, bad ki khynnah skul ba la poi ban ïashim bynta na baroh ki 12 tylli ki distrk ka jylla ki long 850 ngut.Ha ka jingkren jong ka Kong Isawanda kum ka kongsan, ka la pynpaw ba ka jinglah ban pynlong ïa kane ka lympung baheh, ka jia long hadien ar bnai kiba la dep, ka tnat sports lyngba ka ophis jong ki District Sports Officer (DSO) ka la lah ha ka ban pynlong shwa ïa ka District Level Chief Minister Inter School Athletics Meet bad ki khynnah ba la wan poi mynta ha ka nongbah, ki la dei tang kito kiba la lah ban paw bhaa kiba da long shisha kiba kynsai na kiba kynsai tam bad kiba dei hok ban ïoh pat sa ïa kum kane ka lad bad ka kabu ksiar ban ïoh ïashim bynta ha kane ka lympung mynta ka kynti.
Hynrei lada shim kyllum ha shwa ban pynlong ïa kane ka lympung ha nongbah, ki khynnah baroh kiba la ïashim bynta ha la ki jong ki distrik ki jong ki, kim duna ïa ka 12 hajar ngut.Shuh shuh ka Kong Isawada ka la pynpaw ba ka daw ba la lum biang sa shisien ïa ki khynnah ïalehkai hangne hapoh ka nongbah ka long ban lap bad ban shem shuh shuh sa mano pat napdeng ki nongwan ïashim bynta kiba shim ïa ka bynta kum ki nongïalehkai ba kynsai na kiba kynsai tam, da ka jingkyrmen ba ha kine ki lai sngi, baroh kiba wan ban ïashim bynta kin da lah ruh ban pynpra ne ban thaw ïa ki rekod ba thymmai jong kane ka lympung ïakob.
Ha kane ka sngi sdang la lah ha kaban pyndep ïa kiba bun tylli ki heats kiba dei na ka bynta ka track bad ka field event bad la don ruh ki kato katne tylli ki jingïalehkai phainal.
