SHILLONG:
La plie pyrda ïa ka lympung ïakob siat khnam ‘2nd Ntpc National Ranking Archery Tournament’ hangne hapoh nongbah mynta ka sngi ka 20 tarik bad yn sa pynhap pyrda ha ka 28 tarik Lber.
Ha kane ka sngi la wan ban ïa don lem ryngkat da u Pramod Chandurkar, Secretary General Archery Association of India kum u kongsan, Bah Paia War Nongbri Secretary Archery Association of Meghalaya, Rajendra Singh Tomar Treasurer AAI, Bah Finely Pariat General Secretary MSOA, Shri Upendra Mishra, DGM NTPC, Robi Kapoor Commandant 58 GTC, Kong Balarina Syiem District Sports Officer West Khasi Hills District.
Ka kane ka lympung ïakob siat khnam kaba 8 sngi la pynïaid da ka Archery Association of Meghalaya kaba la long ha Archery Ground, SAI. NEHU Campus, Shillong.
Ha ka jingïalehkai ‘Sub junior Recurve, jong ki shynrang, u Agastay Singh na ka jylla Haryana u la long ba nyngkong ha kane ka sngi ha kaba u la lah ban kamai 668 poiñ, u Aditya Jawa na ka jylla Rajasthan u la lah ban kamai 667 poiñ u la wan ba ar bad u Mudit n ka jylla Haryana u la wan ba lai hadien ba u la kamai 644 poiñ.
Haba phai pat sha ka jingïalehkai ‘Sub Junior boys compound’, u Abhi Khatri na Delhi u la wan ba nyngkong hadien ba u la kamai 694 poiñ, u u Harsh Kumar na Chandigarh u la wan ba ar bad u la kamai 688 poiñ bad u Surendra Gat na Rajashthan u la wan ba lai hadien ba u la kamai 687 poiñ.
Katba ha ka liang jong ki kynthei, ha ka thup ‘Sub Junior Girls Compound’ ka Tanishka Bhatia na Delhi ka la wan ba nyngkong hadien ba ka la kamai 685 poiñ, ka Kamid Saini na Delhi ka la wan ba ar bad kamai 682 poiñ bad ka Ekta Rani na Delhi kaba ka kamai 681 poiñ ka la wan ba lai.
