SHILLONG
Ka long ka khubor kaba thymmai na ka bynta ki paralok kiba na Rilum Garo ba ki khynnah ïalehkai kiba don ha kitei ki thaiñ ki la sdang ban ïalehkai bha mynta u snem ha kane ka lympung State Level Subroto Mukherjee Cup Football Tournament 2023 ba la pynlong da ka Directorate of Sports & Youth Affairs, Government of Meghalaya.
Man u snem ki khynnah na Garo Hills kim ju ïoh ïa ka jingjop bad baroh ki jingïakhun na ki distrik bapher bapher ki mad ïa ka nam rem bad kim ju ïoh lad ban rung sha kawei pat ka wat. Lah ong ban ba kan long ka khana ban sah pateng (history) bad ka rekod kaba thymmai na ka bynta ki khynnah jong ka Garo Hills ba ki la ïoh ïa ka jingjop naduh ba sdang kane ka lympung (24 Naitung 2023).
Ïa kane ka lympung ba la pynlong ha lai tylli ki jaka jong ka East Khasi Hills, kiba kynthup ïa ka SAI, STC, NEHU , MFA Ground bad Madan Heh Mawlai, yn pynkut ha ka 28 Naitung 2023. Ki don 3 tylli ki thup ne ki kyrdan ïalehkai ha kane ka lympung mynta u snem, kata ha ka thup jong ki khynnah kiba 14 bad 17 snem jong ki shynrang bad hapoh 17 snem jong ki kynthei.
Ha ka jingïoh ban sdang ïa ka jingïakhun mynta u snem, ka South West Garo Hills Okkapara Sec. School ka la pynliem da 1-0 ïa ka Ri Bhoi Myngken Christian Hr Sec School lyngba ka kol jong uWeltin Sangma (Jr. No. 15) ha ka minit ba 54. Katba ha ka jingïakhun kaba mynta ka sngi ka 25 Naitung, ka South West Khasi Hills, Mawkyrwat ka la liem noh da 2-0 ha ka South West Garo Hills.
Haba phai ha ka jingïakhun jong kine ki khynnah kiba hapoh 17 snem, ka South West Khasi ka la ñion bad ïoh kabu bha ban thep kol ïa ka Garo Hills hynrei namar ka jingbym lah ban thep kol, ka Garo Hills ka la shim kabu bad pynliem ïa ka SWKH.
9 tylli ki skul kiba don ha SWKH District ki la ïoh ban ïashim bynta ha kane lympung, kynthup ïa ka Jakrem Sec. School, Balang Mawlangwir Hr. Sec. School, Nineset Sec. School, Phlorosy Dew Sec. School, Wahkaji Sec. School, Tenset Sec. School, Horirai Syiemlieh Memo Hr. Sec. School, Sngap syiem College, Mawkyrwat bad Rangthong Christian Hr. Sec. School. Haduh 5 ngut ki khynnah na ka Rangthong School ki la don ha kane ka kynhun.
