გუშინ, წითელ ბაღთან სკოლის მოსწავლეებს შორის დაპირისპირება ბანკეტის გამო დაიწყო,- ამის შესახებ ადვიკატმა რამაზ ჩინჩალაძემ ჟურნალისტებთან საუბრისას განაცხადა. ის იმ მოზარდის ადვოკატია, რომელმაც გამძიებას დღეს ჩვენება მისცა.

„ სწავლობდა პირველ ექსპერიმენტულ სკოლაში, დაახლოებით 9 კლასი იქ ისწავლა, შემდეგ გადავიდა 35-ე სკოლაში. როდესაც პირველი ექსპერიმენტული სკოლის მოსწავლეებმა გადაწყვიტეს ბანკეტის გაკეთება, არ მოეწონა მათი დაპატიჟება სხვას, თქვა რომ ეს უნდა შეთანხმებულიყო მთლიან კლასთან და არა ერთ-ორ პიროვნებასთან, ამის გასარკვევად თუ რატომ არ სურდათ ჩემი დაცვის ქვეშ მყოფი და მასთან ერთად მყოფი კიდევ რამდენიმე პიროვნება ეხილათ ბანკეტზე შეხვდნენ ერთმანეთს მდგომარეობის გარკვევების მიზნით და დაიძაბა ურთიერთობა“,- განაცხადა რამაზ ჩინჩალაძემ.

დღეს შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს სამმართველოს თანამშრომლებმა 2000 წელს დაბადებული ა.ნ. ჯანმრთელობის განზრახ მძიმე დაზიანების ბრალდებით დააკავეს. მის მიერ ჩადენილი დანაშაული 3-დან 6 წლამდე ვადით თავისუფლების აღკვეთას ითვალისწინებს.

„გამოძიებამ დაადგინა, რომ მიმდინარე წლის 31 იანვარს თბილისში, ალ.ყაზბეგის გამზირზე, ე.წ. წითელი ბაღის ტერიტორიაზე, ა.ნ.-მ ურთიერთშელაპარაკებისას ყოფილ თანაკლასელებს - 2000 წელს დაბადებულ ნ.ც.-ს და 2000 წელს დაბადებულ ი.ც.-ს ცივი იარაღით მუცლისა და გულმკერდის არეში თითო ჭრილობა, ხოლო 2000 წელს დაბადებულ ლ.ხ.-ს ხელზე მსუბუქი ჭრილობა მიაყენა და შემთხვევის ადგილიდან მიიმალა. სამივე დაჭრილი არასრულწლოვანი საავადმყოფოში გადაიყვანეს. მათ სიცოცხლეს საფრთხე არ ემუქრება.

სამართალდამცველებმა ა.ნ., ჩატარებული სამძებრო ღონისძიებების შედეგად, ცხელ კვალზე, თბილისში დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო. გამოძიება ჯანმრთელობის განზრახ მძიმე დაზიანების ფაქტზე მიმდინარეობს, საქართველოს სსკ-ს 117-ე მუხლით“,- ნათქვამია შსს-ს განცხადებაში. 

თბილისში ორი არასრულწლოვანი დაჭრეს

ექიმის თქმით, დაჭრილი მოზარდების ჯანმრთელობის მდგომარეობა სტაბილურია