ბულგარეთმა ქვეყნის სამხრეთით მოსაზღვრე თურქეთი და საბერძნეთი გააფრთხილა, რომ მოსალოდნელი ძლიერი წვიმის შედეგად შესაძლოა, მდინარეები, არდა და მარიცა ადიდდეს, რამაც შესაძლოა მეზობელი ქვეყნების ტერიტორიების დატბორვა გამოიწვიოს. მდინარე არდა მიედინება საბერძნეთში და უერთდება მდინარე მარიცას, საბერძნეთისა და თურქეთის საზღვართან.
როგორც Reuters წერს, ბულგარეთის საგარეო საქმეთა მინისტრმა გუშინ განაცხადა, რომ აღმოსავლეთ როდოპის მთებში ივაილოვგრადის კაშხალი მოსალოდნელი წვიმის გამო შესაძლოა, გადაივსოს.
როგორც ბულგარეთის ოფიციალური უწყებები აცხადებენ, ოთხშაბათსა და ხუთშაბათს მოსალოდნელია წყლის დონის განსაკუთრებული ზრდა მდინარე მარიცაზე, ბულგარეთის ქალაქ სვილენგრადთან, რომელიც მდენარეობს თურქეთის საზღვართან.
გუშინ, წყალდიდობის გამო, ბულგარეთის ქალაქ ტეტევენში ერთი ადამიანი დაიღუპა. მთავრობამ მოსალოდნელი წყალდიდობის გამო, რამდენიმე მუნიციპალიტეტში საგანგებო მდგომარეობა გამოაცხადა.