პიკასოს „ალჟირელი ქალები“ ყველაზე ძვირადღირებული ტილო გახდა, რაც კი აუქციონზე გაყიდულა. ნახატი ნიუ-იორკში Christie's-ს აუქციონზე 179.3 მილიონ დოლარად გაიყიდა. 

მისი თავდაპირველი ღირებულება 140 მლნ იყო, თუმცა ფსონების დადება 11 წუთს გაგრძელდა და ფასმაც მნიშვნელოვნად მოიმატა - იუწყება BBC.

აუქციონზე 141.3 მლნ დოლარად გაიყიდა ალბერტო ჯიაკომეტის სკულპტურა, რომელმაც ყველაზე ძვირადღირებულ სკულპტურებს შორის რეკორდი მოხსნა. 

მყიდველებმა ანონიმურად დარჩენა ამჯობინეს. 

პიკასოს ტილო, რომელზეც კურტიზანი ქალები არიან გამოსახულნი, ნაწილია სერიისა, რომელშიც 15 ნახატი შედის და რომელიც ავტორმა 1954-55 წლებში შექმნა.

აქამდე ყველაზე ძვირადღირებული ტილო ფრენსის ბეკონის „ლუსიენ ფროიდის პორტრეტის ჩანახატი" იყო, რომელიც 142.4 მლნ დოლარად გაიყიდა.