ბიძინა ივანიშვილის დეიდაშვილი, ბიზნესმენი უჩა მამაცაშვილი აცხადებს, რომ გავრცელებულ აუდიოჩანაწერში მის სახელს ბოროტად იყენებენ და „ომეგა ჯგუფთან“ ფარულ გარიგებაში არ მონაწილეობდა.
როგორც მამაცაშვილის მიერ გავრცელებულ განცხადებაშია ნათქვამი, მის გავლენებზე საუბარი მხოლოდ ლეგენდაა და აუდიოჩანაწერზე, რომელშიც მას ახსენებენ, პროკურატურისგან გამოძიების დაწყებას მოითხოვს.
„ლეგენდები ჩემი, ე.წ. „განსაკუთრებული გავლენების“ შესახებ არახალია და მას პერიოდულად თხზავენ ადამიანები, რომელთაც ამ ლეგენდის მეშვეობით უკანონო სარგებლის მიღება სურთ. გამონაკლისი, არც „ომეგა ჯგუფის“ ირგვლივ, ამ ბოლო დროს, მიმდინარე აჟიოტაჟია.
ჩემთვის უცნობია, კონკრეტულ შემთხვევაში, საქმე გვაქვს „ომეგა ჯგუფის“ ხელმძღვანელების მხრიდან გამიზნულ პროვოკაციასთან, ყოფილი მაღალჩინოსნის არაჯანსაღ ინტერესებთან თუ სიყალბესთან.
თუმცა, ყველა შემთხვევაში, ვიღაც აშკარად ცდილობდა ჩემი სახელის საეჭვო და უკანონო გარიგებებში გამოყენებას და ამ კამპანიას აშკარად პოლიტიკური ელფერი აქვს. შესაბამისად, მივმართავ საქართველოს პროკურატურას, რათა დაუყოვნებლივ დაიწყოს გამოძიება აღნიშნულ ფაქტზე და ამომწურავი პასუხი გასცეს საზოგადოებაში გაჩენილ ლეგიტიმურ კითხვებს“, - ნათქვამია მამაცაშვილის განცხადებაში.
ტელეკომპანია „რუსთავი 2-ის“ გავრცელებულ ჩანაწერში, სავარაუდოდ, სპორტის ყოფილი მინისტრი ლევან ყოფიანი და, სავარაუდოდ, „ომეგა ჯგუფის” დამფუძნებელი ზაზა ოქუაშვილი ესაუბრებიან ერთმანეთს. „რუსთავი 2-ის“ ცნობით, ლევან ყიფიანი ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება.
ჩანაწერიდან ჩანს, რომ, სავარაუდოდ, უჩა მამაცაშვილი „ომეგა ჯგუფის” პრობლემების მოსაგვარებლად მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა, სანაცვლოდ კი 2 მლნ დოლარს მოითხოვდა.
