აფხაზები და რუსები შავ ზღვაში ბიორესურსების მარაგითა და თევზჭერის შედეგებით შეშფოთებული არიან. მეთევზეობის რუსულ-აფხაზური კომისიის განცხადებას „აბხაზია-ინფორმი“ ავრცელებს.
მასში ნათქვამია, რომ აფხაზეთის სანაპიროზე წლიდან წლამდე ქაფშიას რაოდენობა მცირდება, ხოლო 2023 წელს აფხაზეთის საზღვაო წყლებში, დაახლოებით, 100 000 ტონა ქაფშია გამოიზამთრებს. ამ მარაგზე დაყრდნობით, რუსულ-აფხაზურმა მეთევზეობის კომისიამ ამ თევზის დასაჭერად მხოლოდ 35 000-ტონიანი ლიმიტი დააწესა. ამასთან, კომისიის გადაწყვეტილებით, ერთობლივი რეწვის დასაშვები ოდენობა მხოლოდ მხარეთა შეთანხმებით შეიძლება გაიზარდოს.
კომისიის მიერ განსაზღვრული ვადებისა და გემების რაოდენობის მიხედვით, რუსი მეთევზეები 2022-2023 რეწვის სეზონზე აფხაზეთის ზღვის წყლებში ქაფშიას ჭერას, მაქსიმუმ, ოთხი გემით შეძლებენ, რომელთა სუფთა ტევადობაც 280 რეგისტრული ტონა, ანუ, დაახლოებით, 680 კუბური მეტრი უნდა იყოს. ამასთან, დაჭერილი მოცულობა რეკომენდებულ ზღვარს არ უნდა აღემატებოდეს. თითოეულ გემზე ქაფშიას მოპოვებას სრულიად რუსეთის მეთევზეობისა და ოკეანოგრაფიის კვლევითი ინსტიტუტის აზოვი-შავი ზღვის ფილიალის წარმომადგენელი გაუწევს მონიტორინგს.
ბოლო წლებში აფხაზურ მხარეს არაერთხელ განუცხადებია, რომ ჭარბი თევზჭერის გამო მის სანაპიროებთან ქაფშიას რაოდენობა სულ უფრო მცირდება. კერძოდ, ბოლო ათი წლის განმავლობაში ქაფშიას ჭერა მხოლოდ იზრდებოდა, რამაც საბოლოოდ მისი მკვეთრი შემცირება გამოიწვია. 2021-2022 წლების რეწვის სეზონზე აფხაზმა მეთევზეებმა, დაახლოებით, 60 ათასი ტონა ქაფშია დაიჭირეს. „აბხაზია-ინფორმის“ ცნობით, ეს პროდუქტი აფხაზეთის მაღაზიების დახლებზეც იშვიათი გახდა.
აფხაზი მეთევზეები სანაპიროებთან ქაფშიას შემცირების ძირითად მიზეზად მკაფიო კანონმდებლობის არარსებობასა და უკონტროლო თევზჭერას ასახელებენ, ამიტომ ისინი რუსული რეგულაციების გადმოტანას მოითხოვენ. ამჟამინდელი წესები მხოლოდ ადგილობრივი მეწარმეებისთვის ქაფშიას ჭერის კვოტირებას ითვალისწინებს.
დაჭერილი ბიორესურსი ადგილობრივ თევზის ქარხნებში თევზის ფქვილად და ცხიმად გადამუშავდება, რომლის რეალიზაციიდან მიღებული შემოსავალი აფხაზეთის დე ფაქტო მთავრობის ბიუჯეტისთვის ერთ-ერთი მთავარი წყაროა.
„აბხაზია-ინფორმის“ ცნობით, თითქმის, ყველა გადამუშავებული თევზი ექსპორტზე თურქეთსა და რუსეთში გადის. თურქმა ბიზნესმენებმა, ადგილობრივებთან ერთად, აფხაზეთში უკვე თევზის გადამამუშავებელი შვიდი ქარხანა ააშენეს. ამასთან, აფხაზებს საკუთარი სათევზაო ფლოტი არ გააჩნიათ, ამიტომ აფხაზი მეწარმეები, თევზჭერის კვოტის მიღების შემდეგ, გემებს მეთევზეებიანად თურქეთში ქირაობენ.