როგორ მოერგო ბიზნესი ახალ რეალობას? რა გავლენა მოახდინა ხის კოტეჯების მწარმოებელ „kohi.ge“ - ს საქმიანობაზე რუსეთის უკრაინაში შეჭრამ და როგორ აპირებენ ევროკავშირში ბაზარზე გასვლას?
მიუხედავად გაყიდვების შემცირებისა, კომპანიას სახლებზე ფასები არ გაუძვირებია, რადგან ნედლეული რუსეთიდან აღარ შემოაქვს და თითქმის სრულად ქართულ წარმოებაზეა გადასული.
„კომერსანტს“ „Kohi.ge“ - ს დამფუძნებელი ირაკლი ლომიძე: „როდესაც უკრაინაში ომი დაწყო, შარშან იანვარში დაწყებულ შეკვეთებს ვასრულებდით, თუმცა პროექტები ომიდან გამომდინარე შეჩერდა, იანვარი, მარტი აპრილი და თითქმის მთელი მაისი ახალი შეკვეთები არ მიგვიღია, დაკონტრაქტებული პროექტები რაც იყო ისიც გააუქმეს. დაახლოებით 90% -იანი ვარდნა გვქონდა, თუ ომამდე თვეში ვიღებდით 20 შეკვეთას ომის დროს 1-2 ზე ჩამოვიდა. ახლა იმ სამ თვესთან შედარებით დიდი პროგრესი გვაქვს, თუმცა ომამდელ ნიშნულს ჯერ მაინც ვერ დავუბრუნდით“.
ირაკლი ლომიძე “კომერსანტთან“ მომხმარებლის კონტინგენტის ცვლილებაზეც საუბრობს და აღნიშნავს, თუ ადრე მოთხოვნა ძირითადად ბიზნესის მხრიდან იყო და პატარა სასტუმროებს და საკურორტო დასახლებებს უკვეთავდნენ, წელს ეს მოთხოვნა შეიცვალა და ძირითადად სახლებს კერძო პირები საცხოვრებლად უკვეთავენ. ლომიძის თქმით აქტუალური თბილისის შემოგარენია, ძირითადად საგურამო, მამკოდა და ლისი.
„ჩვენ კონკურენტებს სახლებზე ფასის გაზრდა დასჭირდათ, თუმცა ეს ჩვენ არ შეგვხებია, რადგან ჩვენ გადავედით ქართულ ხეზე, ჩვენ შევიძინეთ დანადგარი, რომლითაც ვახდენთ ქართული ხის გამოშრობას, ვფიქრობ რუსულ ხეს ჩვენი ხე არაფრით ჩამოუვარდება.
აღსანიშნავია ისიც, რომ მაღალმთიან ტყეში ჯერ მოუჭრელ ქართულ ხეზე ფასი საგრძნობლად არის გაზრდილი თუ ადრე 1 კუბური მეტი ღირდა 50 ლარი, ახლა მისი ფასი 190 ლარი გახდა. გარდა ამისა საქართველოში ამ ბაზარს ბევრი რეგულაცია აქვს, თუ არ გაქვს ლიცენზია ხეს ვერ მოჭრი და ვერ გადაამუშავებ. ჩვენ არ ვჭრით ხეს ტყეში. გვყავს პარტნიორი კომპანიები, რომლებიც გვაწვდიან ახალ მოჭრილ ფიცარს, ჩვენ კი ვახორციელებთ მისი ღრმა დამუშავებას , თუმცა, ეს ყველაფერი რუსეთიდან ნედლეულს შემოტანაზე უფრო იაფი გვიჯდება, ამიტომ ჩვენი მომხმარებლისთვის სახლები არ გაგვიძვირებია.
რაც ეხება მოსაპირკეთებელ მასალას, გვყავს პარტნიორი კომპანია, რომელმაც ნატახტარში მოსაპირკეთებელი მასალის წარმოება დაიწყო, მათი ფასებიც რუსეთიდან იმპორტირებულზე გაცილებით ნაკლებია.
პრაქტიკულად მთლიანად ქართულ პროდუქციაზე გადავედით, თუმცა მოსაპირკეთებელი მასალის მწარმოებელ კომპანიას ისეთი წარმადობა არ აქვს, რომ ჩვენი მოთხოვნა სრულად დააკმაყოფილოს და ჯერჯერობით მასალის ნაწილი თურქეთიდანაც შემოგვაქვს“, - აღნიშნა ირაკლი ლომიძემ.
ირაკლი ლომიძე ამბობს რომ kohi.ge ს სახლები, მალე ევროკავშირშიც გამოჩნდება, რომელსაც წარწერა „დამზადებულია საქართველოში“ ექნება, თუმცა ამ ეტაპზე რუსეთ უკრაინის ომმა სახლების ევროპაში ექსპორტი შეაჩერა. „kohi.ge“ ბულგარეთში შვილობილ კომპანიასაც ფლობს, რომელიც სახლებს ევროპის ქვეყნებისთვის ამზადებს.
„ამ ომმა მარტო საქართველოზე და უკრაინაზე კი არ იმოქმედა, ევროპაზე ახდენს გავლენას და ჯერ საქართველოდან ევროპაში სახლები არ გაგვიტანია, თუმცა უკვე თითქმის ერთი წელია, რაც ბულგარეთში გვაქვს შვილობილი კომპანია, რომელიც იქაური მასალით აშენებს სახლებს. სამომავლოდ ფოთის ინდუსტრიულ ზონაში ვაპირებთ გადასვლას, საიდანაც ევროკავშირში საქართველოში წარმოებულ სახლებს გავიტანთ, ეს პროცესი ომმა დიაპაუზა, თუმცა სამომავლოდ აუცილებლად გავაგრძელებთ“, - აღნიშნა ირაკლი ლომიძემ.
თაკო კვაჭანტირაძე