11 წელი გავიდა მას შემდეგ, რაც ვაკეში, ყოფილი „ლეჩკომბინატის“ ტერიტორია გასხვისდა. ისტორიული ობიექტი 2010 წელს ეკონომიკის სამინისტრომ 7,3 მლნ დოლარად შპს „ლეჩკომბინატი №1“-ს (წარსულში შპს დილა 2010) მიჰყიდა.
მრავალპროფილური საავადმყოფოს პროექტი დასამტკიცებლად ინვესტორმა დედაქალაქის მთავრობას პირველად 2013 წელს წარუდგინა, თუმცა თბილისის მერიამ პროექტი არ მოიწონა. შპს „ლეჩკომბინატი №1“-მა პროექტის შეთანხმება და მშენებლობის ნებართვის მოპოვება 2014 შეძლო.
2017 წელს პროექტი სრულად იცვლება - კომპანია ტერიტორიაზე მრავალპროფილური სამედიცინო ცენტრის, ლანდშაფტური პარკის და მუზეუმის მშენებლობას გეგმავს. თუმცა, წარმოდგენილი ესკიზის უარი ეთქვა. გაიცა რეკომენდაცია, რომ სივრცით გეგემარებითი გადაწყვეტა დამუშავდეს.
განახლებული პროექტი, რომლის მიხედვითაც ტერიტორიის უდიდესი ნაწილი გამწვანებულ სივრცეს უნდა დათმობადა, დედაქალაქის მთავრობამ ერთი წლის შემდეგ მოიწონა. მშენებლობის ვადა 2018 წლის ოქტომბრიდან 2021 წლის ოქტომბრის ჩათვლით განისაზღვრა. თუმცა, 2019 წელს ტერიტორიაზე მომხდარი ტრაგედიის გამო პროექტის მშენებლობა შეჩერდა - სამუშაოების დროს 2 მუშა დაიღუპა. საქმეზე უსაფრთხოების წესების დარღვევის ბრალდებით ქვეკონტრაქტორი კომპანიის „ხიმიჯ სერვისის“ დირექტორი დააკავეს.
გასულ წელს შპს „ლეჩკომბინატი №1“-ს პროექტი კიდევ ერთხელ შეცვალა. განმარტებით ბარათის მიხედვით ირკვევა, რომ 2018 წელს შეთანხმებული პროექტისაგან განსხვავებით, წარმოდგენილ ვერსიაში, უშუალოდ ჭავჭავაძის გამზირზე მდებარე ნაწილზე განხორციელდა პრინციპული ხასიათის ცვლილება. კერძოდ, წრიულად განლაგებული ლიფტების მაგივრად, გაჩნდა საფეხმავლო პანდუსი. ცვლილება აგრეთვე შეეხო პარკის სიღრმეში მიმდებარე მოცულობას, თუმცა უფრო მეტად ფასადის ელემენტების ნაწილში.
შეგახსენებთ, რომ წარმოდგენილი პროექტი გულისხმობს სამკურნალო კომბინატის ტერიტორიაზე მრავალპროფილური სამედიცინო დაწესებულების განთავსებას.
განმარტებით ბარათში აღნიშნულია, რომ საპროექტო ტერიტორიაზე მოწყობილი პარკი იქნება საჯარო მოხმარებისათვის, ლანდშაფტურ - სარეკრეაციო დანიშნულებით. პარკის ცენტრალურ ნაწილში მოეწყობა წრიული ფორმის აუზი, როგორც საჯარო სივრცის კომპოზიციური ცენტრი. დოკუმენტში წერია, რომ ლანდშაფტური პროექტით, გათვალისწინებულია, საფეხმავლო ბილიკების ორი ტიპის მოწყობა. საუბარია მუდმივ, მყარ-საფარიან და გათელილი ბალახის, გრუნტის საფარიან ბილიკებზე. აუზის პერიმეტრის დიდ ნაწილზე მოეწყობა მყარი საფარი, დაიდგმება საბაღე ავეჯი.
ტერიტორიაზე განთავსდება მრავალპროფილური საავადმყოფო, რომელიც კონცეფციის თანახმად მოიცავს, როგორც სამკურნალო ასევე სარეაბილიტაციო კომპონენტებს.
პროექტის მიხედვით, სარეაბილიტაციო კომპონენტი გულისხმობს, ბავშვთა და მოზრდილთა ფსიქო-ფიზიკურ რეაბილიტაციას, მათი კულტურულ - სახელოვნებო აქტივობებში ჩართულობის გზით. განმარტებით ბარათში წერია, რომ აღნიშნული მიზნისათვის მისადაგებულია შენობის ბ-ბლოკი, სადაც იგულისხმება, შესაბამისი კლასებითა და დარბაზებით აღჭურვილი საგამოფენო სივრცეების შექმნა, შენობის მიწისქვეშა ნაწილში. აქვე განთავსდება გალაკტიონის მუდმივი მემორიალური ექსპოზიცია და უნივერსალური საგამოფენო სივრცე, დროებითი ექსპოზიციებისთვის.
განმარტებით ბარათში ვკითხულობთ, რომ შენობის სამკურნალო ნაწილი (ბლოკი - ა) ტერიტორიის სიღრმეში განთავსდება და მიუხედავად სტრუქტურული და ფუნქციური ერთიანობისა გარე სიბრტყეების დამუშავების თვალსაზრისით თვითმყოფად კომპოზიციას წარმოადგენს. შენობა ხუთ სართულიანი იქნება, რომელთაგან ერთი მიწისქვეშა სართულია. ა-ბლოკში შესვლა ხდება, შენობის უკანა მხრიდან და პარკის დონიდან.
დოკუმენტში ასევე წერია, რომ ყოფილი საავადმყოფოს შენობის დაკონსერვებული შესასვლელი ბლოკის სამსართულიანი მოცულობა მოექცევა, ოვალური მოხაზულობის სტრუქტურაში, რომლის ინტერიერიც დაეთმობა ვესტიბიულს, სასადილოსა და ადმინისტრაციულ ნაწილს. ამ შენობის, სახურავი იფუნქციონირებს როგორც თავისუფალი საჯარო სივრცე, ერთგვარი ბელვედერი, რომელზე მოხვედრაც შესაძლებელი იქნება 24 საათის განმავლობაში შენობაში შეუსვლელად, გარედან დამონტაჟებული ვერტიკალურად მოძრავი პლატფორმების საშუალებით.
ირკვევა, რომ საპროექტო ტერიტორიაზე მოეწყობა მიწისქვეშა ავტოსადგომი, რომელიც მოემსახურება როგორც საავადმყოფოს, ასევე პარკის ვიზიტორებს. გავრცელებული ინფორმაციით, კომპლექსის მშენებლობა 2022 წელს დასრულდება.
ბაჩო ადამია