ბათუმის მთავარი ნაძვის ხის შესარჩევი კონკურსი დასრულდა. ბათუმის მერიის ინფორმაციით, გამოკითხვაში მონაწილეობა 20 ათას 857-მა მოქალაქემ მიიღო.
ყველაზე მეტი მოწონება - 13 ათას 704 ხმა მესამე ესკიზმა დააგროვა.
შეგახსენებთ, რომ 22 აგვისტოს ბათუმის მერიამ მთავარი ნაძვის ხის დიზაინის შესარჩევად გამოკითხვა დაიწყო. როგორც მერიის მიერ გავრცელებულ ინფორმაციაში იყო აღნიშნული, უახლოეს პერიოდში ნაძვის ხის შესაძენად იგეგმება ტენდერის გამოცხადება და მოქალაქეებს საშუალება ეძლეოდათ დიზაინის შერჩევაში მიეღოთ მონაწილეობა. საკონკურსოდ სულ წარმოდგენილი იყო 4 დიზაინი.
„ბათუმელები“ რამდენიმე დღის წინ წერდა, რომ ბათუმის 2022 წლის ბიუჯეტში, ზოგადად ქალაქის გაფორმების ღონისძიებებისთვის, ჯამში 3 132 300 ლარია გათვალისწინებული. ბიუჯეტის კანონში განმარტებულია, რომ „საშობაო-საახალწლო დღესასწაულისთვის ქალაქის გაფორმება [2022 წლის დეკემბერი – 2023 წლის მარტი], მრავალწლიანი პროექტია და სამუშაოების საერთო ბიუჯეტი შეადგენს 2 961 420 ლარს“. ახალ მთავარ ნაძვის ხესაც სწორედ ამ თანხიდან შეიძენენ.