საქართველოში რეგისტრირებული მსუბუქ ავტომობილებს შორის ყველაზე გავრცელებულ ბრენდებში მესამე ადგილზე საბჭოური VAZ-ია, — ინფორმაცია „თიბისი კაპიტალის“ საავტომობილო სექტორის კვლევაშია აღნიშნული.
საქართველოში საბჭოური VAZ-ის ე.წ. „ჟიგულის“ 154 769 ავტომობილია რეგისტრირებული, რასაც კვლევის ავტორები საქართველოს საკანონმდებლო სისტემით ხსნიან, რომლის მიხედვითაც დღემდე არ არსებობს ავტომობილის რეგისტრაციის გაუქმების შესაბამისი მექანიზმი.
„საქართველოში ავტომობილებს რეგისტრაციიდან აქტიურად არ ხსნიან. ჩვენი ვარაუდით, ამ 154 ათასი „ჟიგულიდან“, შესაძლოა დიდი ნაწილი არ იყოს რეალურად ექსპლუატაციაში. უბრალოდ, ფიქსირდება მათი კვლავ აქტიური სტატუსი. მოქალაქეებს არანაირი მოტივაცია არ აქვთ, ძველი ავტომობილის რეგისტრაცია გააუქმონ, რადგან ამაზე გადასახადის გადახდა არ უწევთ. შესაბამისად, წლებია VAZ -ი ფორმალურად ლიდერ პოზიციაზე რჩება“, — აღნიშნავენ „თიბისი კაპიტალში“.
„თიბისი კაპიტალის“ ინფორმაციით, ავტომობილზე ერთადერთი გადასახადი რაც არსებობს, არის ქონების გადასახადი ანუ როცა ოჯახის შემოსავალი აჭარბებს 40 ათას ლარს უკვე სავალდებულოა მოძრავი ქონების მითითებაც. თუ მოქალაქის შემოსავალი არ აჭარბებს 40 ათას ლარს, რეალურად შეუძლია ჰყავდეს რამდენიმე მანქანა საკუთარ სახელზე და არანაირ გადასახადს არ გადაიხდის. ეს არის ერთ-ერთი ფაქტორი, შესაბამისად მფლობელს მოტივაცია არ აქვს, რომ მის სახელზე არ ირიცხებოდეს ძველი რეგისტრირებული ავტომობილები.