ჩერნობილის გაჩერებულ ატომურ ელექტროსადგურს ელექტროენერგიის მიწოდება შეუწყდა, რამაც მსოფლიო რადიაციის გაჟონვისა და ახალი ეკოლოგიური კატასტროფის საფრთხის წინაშე კიდევ ერთხელ დააყენა. დიზელის გენერატორების მუშაობის რესურსი 48 საათია, თუ ამის შემდეგ გაგრილების სისტემა გამოირთო, შესაძლოა კოშმარული პროცესები შეუქცევადად წარიმართოს. ინფორმაციას აღნიშნულის შესახებ უკრაინის საგარეო საქმეთა მინისტრ დმიტრო კულებაზე დაყრდნობით The guardian ავრცელებს.
ჩერნობილის ატომური ელექტროსადგურის ოკუპაცია, რუსულმა არმიამ ინტერვენციის პირველივე დღეს - 24 თებერვალს მოახდინა. სამშაბათს ატომური ენერგიის საერთაშორისო სააგენტომ IAEA-მ განაცხადა, რომ სადგურიდან ინფორმაციას ვეღარ იღებს, რაც შეშფოთების საფუძველს იძლევა.
ჩერნობილის გარდა, 4 მარტს რუსეთის საოკუპაციო ძალებმა ევროპის უდიდესი ზაპოროჟიეს ატომური ელექტროსადგურიც დაიკავა, რომლის დაცვასაც რამდენიმე თანამშრომლის სიცოცხლე შეეწირა.
1986 წლის 26 აპრილს ჩერნობილის სადგურზე მომხდარმა აფეთქებამ რადიაციის გაჟონვა გამოიწვია, რამაც წლების განმავლობაში სხვადასხვა დაავადებით ათობით ათასი ადამიანის გარდაცვალება გამოიწვია. მაშინ აფეთქება 4-დან 1 რეაქტორზე მოხდა, რომლის სიმძლავრეც 1000 მეგავატს შეადგენდა. 30 კმ-ის რადიუსში მკვდარი ზონა გამოცხადდა. ზაპოროჟიეს სადგურის სიმძლავრე კი 5.7 გიგავატს შეადგენს.