მზის ალერგია - სიმპტომები და მკურნალობის გზები 

მზის ალერგია, იგივე მზის ურტიკარია, არის ტერმინი, რომელიც აღწერს მდგომარეობას, როდესაც მზის ზემოქმედების შემდგომ კანზე თავს იჩენს წითელი ფერის გამონაყარი, რომელსაც თან ახლავს ქავილი. რაც უფრო ძლიერია მზის ზემოქმედება, მით უფრო ძლიერია საპასუხო რეაქციაც. 

ალერგიების ზოგიერთი ფორმა გენეტიკური ტიპისაა, თუმცა გვხვდება შეძენილი სახესხვაობებიც, რომელთაც ისეთი მაპროვოცირებელი ფაქტორები უსწრებთ წინ, როგორიცაა მედიკამენტების მიღება ან ველური მცენარეების შეხება. 

მზის ალერგიის სიმპტომები 

კანისმიერი გამოვლინება შესაძლოა განსხვავდებოდეს ერთმანეთისგან, თუმცა არის სიმპტომთა ერთობლიობა, რომლებიც ყველასთვის საერთოა,  ესენია : 

• სიწითლე
• ტკივილი ან ქავილი
•  კანის ზედაპირიდან წამოწეული მცირე ზომის გამონაყარი, რომელთაც გააჩნიათ მიდრეკილება გაერთიანებისკენ 
• გამონაყრის ზედაპირზე ვეზიკულების (ბუშტუკების) ფორმირება, რომელთაც ასევე გააჩნიათ მიდრეკილება გაერთიანებისკენ
• ზედაპირის აქერცვლა, ქერქით დაფარვა ან სისხლდენა

ყველა ეს სიმპტომი თავს იჩენს მხოლოდ იმ ადგილზე, სადაც მოხდა მზის სხივების ზემოქმედება და ამისთვის შესაძლოა საკმარისი იყოს რამდენიმე წუთიდან რამდენიმე საათამდე პერიოდი. 

როდის მივმართოთ ექიმს? 

სასურველია მიმართოთ სპეციალისტს თუ მზის ზემოქმედების ქვეშ ყოფნის შემდგომ შეამჩნიეთ უჩვეულო გამონაყარი ზემოთ აღწერილი მახასიათებლებით, ხოლო თუ გამოხატულია მწვავე ფორმა და ეს ყველაფერი დროში გაგიხანგრძლივდათ დაუყოვნებლივ უნდა მიმართოთ დერმატოლოგს, რაშიც REDMED-ის ვიდეო კონსულტაციის ფუნქცია დაგეხმარებათ.  

რა იწვევს მზის ალერგიას ? 

გამომწვევ მიზეზებს შორის დგანან სხვადასხვა პრეპარატები და ქრონიკული დაავადებები, რომლებიც კანს ხდიან მგრძნობიარეს მზის ზემოქმედებისადმი. გარდა იმისა, რომ მემკვიდრეობითი ფაქტორებიც დიდ როლს ასრულებენ ალერგიის განვითარებაში, არის შემთხვევები, როდესაც ეტიოლოგიის დადგენა ვერ ხერხდება. 

გვაქვს სხვადასხვა რისკ ფაქტორები, რომლებიც ზრდიან ალერგიულ რეაქციას, ესენია: 

• გარკვეული ნივთიერებების ზემოქმედება - არსებობენ ნივთიერებები, რომელთა კანზე დატანის შემდეგ ალერგიული რეაქცია არ ვლინდება, იქამდე, სანამ ზემოქმედებაში არ შევა მზის სხივებთან, შესაძლოა ასეთ იყოს სუნამო, სადეზინფექციო ხსნარები და მზის დამცავში არსებული სხვადასხვა ქიმიური მინარევებიც კი
• მედიკამენტები - არსებობენ პრეპარატები, რომლებიც დამწვრობის განვითარებას ამძაფრებენ, ასეთებია ტეტრაციკლინი, სულფანილამიდები და ისეთი ტკივილგამაყუჩებლები, როგორიცაა კეტოტიფენი
• კანის ფონური მდგომარეობები - დერმატიტის არსებობა ზრდის ალერგიის განვითარების რისკს
• კანის ფერი - დადგენილია, რომ ღია ფერის კანის მქონე ადამიანები უფრო მგრძნობიარეები არიან მზისგან გამოწვეული ალერგიისადმი
• გენეტიკა - მემკვიდრეობითი ფაქტორები დიდ როლს თამაშობენ ალერგიის განვითარებაში

მზის ალერგიის მკურნალობა

მკურნალობის ტაქტიკის შემუშავება ხდება მისი ტიპის და სიმძიმის მიხედვით. მედიკამენტოზურ მკურნალობაში ძირითადად გამოიყენება კორტიკოსტეროიდები, მალამოს ან ტაბლეტების სახით, ასევე გამოიყენება მალარიის სამკურნალო პრეპარატი ჰიდროქსიქლოროქინი (პლაქვენილი). 

გარდა ამისა, იმისათვის რომ მოხდეს მზის ზემოქმედებისადმი რეზისტენტობის ჩამოყალიბება, ხშირად ექიმები მიმართავენ ფოტოთერაპიას ან გვაძლევენ რეკომენდაციას გაზაფხულზე, როდესაც მზის გამოსხივება ძლიერი არ არის, მივიღოთ მსუბუქი მზის აბაზანები. 

რასაკვირველია ამ შემთხვევაში, ისევე, როგორც სხვა დიაგნოზების დროს, არ არის რეკომენდირებული თვითმკურნალობა, და აუცილებელია მკურნალობის ტაქტიკა შემუშავდეს სპეციალისტის მიერ. ონლაინ კონსულტაციის სერვისის მეშვეობით კი ექიმთან ვიზიტი უმოკლეს დროშია შესაძლებელი, რაშიც REDMED-ის პლატფორმა დაგეხმარებათ.