Shillong, Rymphang 24: U Myntri Sorkar Pdeng ba dei khmih ia ka Tnat Ports, Shipping and Waterways (MoPSW) bad Ayush, Sarbananda Sonowal u la iashim bynta ha ka jingialang iasoi ia ka Memorandum of Understanding (MoU) hapdeng ka MoPSW bad ka Indian Institute of Management (IIM) ban plie ia ka ‘Gati Shakti Research Chair’ ba nyngkong jong ka India hangne mynta ka sngi.
Ka Chair kan ialam lynti ha ki kam wad bniah bad ki kam logistic ba bun bynta da kaba phaikhmat sha ka thain shateilammihngi; ka jingkyntiew ia ka jingnang jingtip ha ki jingsaindur thymmai na ka bynta ka jingtei ia ka bor logistic ha ka thain.
Ka Chair ka thmu ruh ban kyntiew ka jingiatreilang bad ki riewshemphang ha kylleng ka pyrthei ban wanrah bad kyntiew ia ka jingnang jingstad bad ka jinglah treikam bad pynkhlain ia ki jingiadei hapdeng ki kam wad bniah ha ki kam jaka pdeng ba bun bynta bad ki kam ban kyntiew ia ka bor treikam bad kiba iadon bynta ha kane ka kam kum kito kiba iadei bad ka jaka pdeng.
Ki kynhun Sorkar, ki bor pyniaid shnong bad kiwei kiwei ki nongiatreilang bad ki kynhun. Ka chair kan kyrshan ruh ia ki kam wad bniah ha ki kam logistic, ki jingkyntiew ia ka bor treikam bad ki jingseisoh ban iarap ia ka PM Gati Shakti Masterplan ban aibor ia ki kam logistic ha ka thain mihngi bad ka thain shateilammihngi.
Ha ka jingai jingkren ha ka jingialang, u Sonowal u la ong, “Mynta, nga sngew donbok ban iadonlang bad baroh ki samla pule jong kane ka jaka pule kaba khraw. Ka bor jong ka Yuva Shakti ka ai mynsiem ia ka jingkut jingmut jong ngi ban iaidshaphrang ban kot sha ka thong jong ka Viksit Bharat hashuwa ban kut ka AmritKaal.
Ki 25 snem ban wan kilong ka KartavyaKaal jong phi ban bteng ia ka jingpynkup bor ia ka roi ka par jong ka India. Lyngba ka jingplie ia kane ka chair ha kane ka jaka pule jong phi, ka thain shateilammihngi ka ieng skhem ban lamkhmat ha ki kam wad bniah bad ka jingkyntiew ia ki kam logistic ba bun bynta, ka jingkyntiew ia ka bor treikam bad ki jingseisoh. Ki samla pule mynta kin ioh lad ban kyntiew ia ki sap jong ki ha ki kam logistic.”
La pynlong ruh ia ka Strategic Round Table ban iakren shaphang ka jingpynkhreh kam ban kyntiew ia ki kam logistic ba bun bynta ban pyniasoh ia ka thain shateilammihngi bad ki bynta bapher bapher jong ka ri bad shabar ri ban pynkhlain ia ka ioh ka kot ha ka thain ha ka Dr APJ Abdul Kalam Centre for Policy Research and Analysis Indian Institute of Management (IIM), Shillong.
La sdang bun ki projek kum ka Arth Ganga bad Mahabahu Brahmaputra ban kyntiew ia ka jingkiew shaphrang ka imlang sahlang bad ka ioh ka kot ha shilynter ka Wah Ganga bad Wah Brahmaputra.
Kine ki jingpynkylla ki la wanrah ki jingseisoh, kumba la paw ha ka jingkiew ka India ha ka Logistics Performance Index jong ka World Bank, kaba la kiew na ka 54 ha u 2014 sha ka 38 ha u 2023, kaba long ka dak jong ka jingkiew na ka kyrdan kaba 54 ha u 2014 sha ka kyrdan kaba 38 ha u 2023, kaba long ka jingkiew haduh 16 kyrdan hapoh ka 10 snem.
Haba kren shaphang ki lad ha ki kam logistic ha ka thain shateilammihngi, u Myntri u la ong, “Hapoh ka jingialam u Narendra Modiji, ka thain shateilammihngi ka la mad ia ka jingkiew bad ka roi ka par ryngkat bad ka shongsukshongsain kaba iaineh.
Ka thain ka la sakhi ka jingkiew ki jingdon jingem, ka jingkiew ha ka jingpyniasoh bad ki lad digital, ka jingkiew ka ioh ka kot, bad shibun kiwei kiwei ki jingjop. Ka sorkar Narendra Modi ka la bei tyngka palat T. 14 lak klur ha ka jingkyntiew ia ki jingdon jingem bad ki lad ka leit ka wan ha ka thain shateilammihngi.
Ka dei lyngba kane ka jingkut jingmut bad ki sienjam ba khlain ba ka thain shateilammihngi jong ka India ka la kylla sha ka nongialam bad ka jaka Pdeng jong ka jingkiew shaphrang ka India ba Thymmai.
Ka Tnat Ports, Shipping, and Waterways, lyngba ka Gati Shakti Research Chair jong ka, ka la pynthikna ia ka bynta ba kongsan jong ka ban iaidshaphrang bad ki jing thmu jong ka Gati Shakti.
Kane ka sienjam ym tangba ka kdew ia ka jingkut jingmut jong ka Tnat ban kyntiew ia ki kam wad bniah bad jingsaindur thymmai hynrei ka kdew ruh ia ka jingithuh jong ka ia ka jingkongsan jong ki kam logistic ba bun bynta ha ka roi ka par jong ka thain shateilammihngi bad ka jingwanrah ia ka jingkyrshan kaba skhem.
Ka Tnat kan long ruh kum ka nongialam lynti ban saindur ia ka jingwad bniah, ka jingpeit ia ki bynta ba kongsan ban wad bniah kiba iahap bad ki thong pyniasoh ba bun bynta jong ka ri, ka jingpynbiang ia ki jingai jingmut na kito kiba trei ha kine ki kam bad ka jingplie lad ia ka jingiatreilang hapdeng ki nongwad bniah, ki nongthaw polisi bad kito kiba don bynta ha kine ki kam.
Shuh shuh, u Sonowal u la ong, “Hapoh ka jingialam ba iohijngai jong u Myntri Rangbah duh Narendra Modi, ka jingsahkut ha ki kam logistic, kiba la shah ktah da ka jingbym lah shim rai da ka Sorkar ba rim, ka la kylla da ka rukom treikam kaba la saindur ban wanrah ka jingsted, ka jingseisoh bad ban tei ia ki lad ban pyniar ha ki kam logistic.
Ha u snem 2014, la thaw ia ka Logistics Division ba thymmai, la plie ia ka PM Gati Shakti National Master Plan na ka bynta ka jingpyniasoh ba bun bynta, la pynbna ia ka National Logistic Policy, bad la saindur ia ka Unified Logistics Interface Platform.
Hapoh ka jingialam jong u Modiji, ka jingpynlut ha ka shi snem jong ka sorkarpdeng ha ki projek ba iadei bad ki jingdon jingem kum ki surok, ki kad lieng, ki lynti rel, bad ki kad liengsuin ka la kiewna ka T. 2 lak klur sha palat T. 11 lak klur.
Ka sienjam Gati Shakti Chair ka thmu ban kyntiew ka jingiadei kaba khlain hapdeng ka sorkar bad ki riewshemphang, kaba wanrah ia ka jingwad bniah kaba khlain bad kaba bha ha ki kam logistic ba bun bynta bad ka jingkhlain ki lad pynpoi mar.
Kane ka rynsan ka don ka bynta ba kongsan ban kyntiew ruh ia ka bor jong ki samla pule bad ki Micro, Small, and Medium Enterprises (MSME) ha ka thain ban pyndonkam pura ia ki jingmyntoi jong ki sienjam kum ka PM Gati Shakti National Masterplan, National Logistics Policy, bad ka Unified Logistics Interface Platform.
Ka IIM Shillong kan ialam lynti ha ki sienjam ban kyntiew ia ki jinglong jingman, kyntiew ia ki bor wad bniah, pyniar ia ki jingwad bniah bad pynkhlain ia ka jingiadei hapdeng ki riewshemphang bad kito kiba trei ha kine ki kam.
Ia u Sonowal la synran lang da ki dkhot jong ka IIM Shillong Board of Governors, AtulKulkarni, BijonDeySaiwan, Member, IIM Shillong Board of Governors, ryngkat u Director, DP Goyal, ki nonghikai bad ki samla pule jong ka institute.
