22 იანვარს საქართველოს დამსახურებული არტისტის, სახალხო არტისტის, ანსამბლ „ივერიას“ სოლისტისა და თბილისის საპატიო მოქალაქის, ნიჭიერი მომღერლის თემურ წიკლაურის დაბადების დღეა.
„Sputnik-საქართველოსთან“ შარშანდელ ინტერვიუში გულწრფელად თქვა, კაცი ამ ქვეყნად რასაც დაირქმევ, ის ხარ, მე დღემდე ბალღად ვრჩებიო.
და მართლაც ბალღური სიმორცხვით გამოტყდა – დაბადების დღის გადახდა ყოველთვის მრცხვენია ხოლმე, რა გავაკეთე ისეთი, რომ არიქა, ქვეყანა შევძრა და ეს დღე აღვნიშნოო.
არადა, გააკეთა! იმდენი გააკეთა, რომ ქართული ესტრადისა და მუსიკალური ისტორიის ნაწილი გახდა.
და რადგან თავად იმორცხვებს, ჩვენ აღვნიშნოთ თემურ წიკლაურის დაბადების დღე და მისივე სიმღერებით მივულოცოთ იუბილე.
