რუსული კერძო სამხედრო კომპანია ვაგნერის ჯგუფის დამფუძნებელი და ოლიგარქი, ევგენი პრიგოჟინი ადასტურებს, რომ წარსულში ფლობდა სანქტ-პეტერბურგში მდებარე კაფე სტრიტ-ფუდ ბარ N1-ს, სადაც პროპაგანდისტი და სამხედრო ბლოგერი, ვლადლენ ტატარსკი ააფეთქეს.
პრიგოჟინის ცნობას საკუთარი პრესსამსახურით ავრცელებს.
პრიგოჟინმა აღნიშნა, რომ კაფე გადასცა მოძრაობა კიბერ Z ფრონტს, რომელსაც თავად "პატრიოტულს" უწოდებს. მისი თქმით, ეს ჯგუფი აქ სემინარებს მართავდა. პრიგოჟინის აზრით, აფეთქებაც ერთ-ერთ მსგავს სემინარზე მოხდა.
ევგენი პრიგოჟინი თვლის, რომ აფეთქების უკან "კიევის რეჟიმი" არ დგას და ეს მოაწყვეს "რადიკალებმა", რომლებსაც მთავრობასთან კავშირში არ აქვთ.
2 აპრილს, რუსეთში, სანქტ-პეტერბურგის კაფეში მომხდარ აფეთქებას რუსი პროპაგანდისტი და სამხედრო ბლოგერი, ვლადლენ ტატარსკი ემსხვერპლა. რუსული მედიის ინფორმაციით, დაშავებულთა რიცხვი 32-მდე გაიზარდა.
არსებული ინფორმაციით, შემთხვევა დამონტაჟებული ასაფეთქებელი მოწყობილობის გააქტიურებას მოჰყვა. რუსული სპეცსამსახურების ცნობით, აფეთქების სიმძლავრე 200 გრამ ტროტილს უტოლდებოდა. მედიაში გავრცელდა ცნობები, რომ ტატარსკის ახალგაზრდა ქალმა გადასცა ქანდაკება, რომელიც 5 წუთის შემდეგ აფეთქდა.