კარტოფილის მობრაწულა ქათმით, ყველითა და არაჟნით თაკო აბაშიძისგან
ავტორი: „თბილისელები“ 12:00 04.03, 2022 წელი
წარმოუდგენელია იყო გურმანი და არ იცოდე კერძების გემრიელად მომზადება. თავად გურმანიც ვარ, მიყვარს გემრიელი საჭმელი და ამიტომ, მიჭირს დიეტების დაცვა. თუმცა, ვფიქრობ, ჯანმრთელობისა და შიმშილის ხარჯზე გარისკვა არც ღირს. მართალია, სამსახურის გამო ყოველდღიურად ვერ ვახერხებ სამზარეულოში ფუსფუსს, მაგრამ თუ დრო მაქვს, ამას სიამოვნებით ვაკეთებ. მიხარია, როცა ოჯახის წევრები თუ მეგობრები ჩემს მომზადებულს აგემოვნებენ, მოსწონთ და მაქებენ. შემოგთავაზებთ მარტივად მოსამზადებელ კარტოფილის მობრაწულას რეცეპტს – ქათმით, არაჟნითა და ყველით, რომელიც ყველას გამოუვა და ძალიან გემრიელი მისართმევია.
საჭირო ინგრედიენტები:
🔸 600 გრამი კარტოფილი, 150 გრამი ხახვი
🔸 500 გრამი ქათმის ფილე
🔸 250 გრამი გახეხილი მაგარი სახეობის ყველი
🔸 3 კბილი ნიორი
🔸 250 გრამი არაჟანი, 2 სუფრის კოვზი მაიონეზი
🔸 ცოტა დაჭრილი ქინძი – ზემოდან მოსაყრელად, მარილი, პილპილი, სუნელები – თქვენი გემოვნებით.
მომზადების წესი 👩🍳
დაჭერით ქათმის ფილე თხელ ნაჭრებად. წვრილად დაკეპეთ ნიორი და მარილთან და პილპილთან ერთად მოაყარეთ ქათმის დაჭრილ ფილეს, მოასხით მაიონეზი და გააჩერეთ მარინადში 20 წუთი. დაჭერით ხახვი ალყა-ალყა. ყველი გახეხეთ მსხვილ სახეხზე. მოამზადეთ შესანელებელი: არაჟანს დაუმატეთ მარილი, პილპილი, სასურველი სუნელები და კარგად აურიეთ. კარტოფილი დაჭერით თხელ წრეებად. ცხიმწასმულ ჟარონაზე მოაწყვეთ ხახვი, ზემოდან კარტოფილი. კარტოფილს წაუსვით არაჟნის სოუსი, ზემოდან დაალაგეთ ქათმის დამარინადებული ფილე. მოაყარეთ გახეხილი ყველი. გაიმეორეთ შემდეგი ფენა – ხახვი, კარტოფილი, არაჟნის სოუსი, ქათმის ფილე. სულ ზემოდან მოახეხეთ ყველი. შედგით 200 გრადუსზე გახურებულ ღუმელში და აცხვეთ 35-50 წუთის განმავლობაში. ზემოდან მოაყარეთ დაჭრილი ქინძი.
გემრიელად მიირთვით!
სიახლეები ამავე კატეგორიიდან