პოლონური პელმენი
ავტორი: „თბილისელები“ 12:00 19.05, 2021 წელი
საჭირო ინგრედიენტები: ცომი – 2 ჭიქა ან ცოტა მეტი ფქვილი, 250 მილილიტრი წყალი, 1 სადილის კოვზი ძმარი, 1 სადილის კოვზი ზეთი, 1 კვერცხი, ცოტა მარილი.
შიგთავსი – 80 გრამი ფხვიერი ყველი, 250 გრამი კარტოფილი, 30 გრამი კარაქი, 2 სადილის კოვზი სოიის სოუსი, 1 სადილის კოვზი არაჟანი, მარილი.
სოუსი – კარაქი, არაჟანი.
მომზადების წესი: ჯერ მოზილეთ ცომი. ღრმა თასში მოათავსეთ კვერცხი, ჩაუმატეთ მარილი, ჩაასხით ცომისთვის განკუთვნილი ზეთი, ძმარი, თბილი წყალი და აურიეთ კარგად. ნელ ნელა ჩაუმატეთ ფქვილი და მოზილეთ ცომი. მისგან გააკეთეთ ბურთი. გაახვიეთ ცელოფანში და მოათავსეთ მაცივარში 30 წუთით.
კარტოფილი გათალეთ და მოხარშეთ. ხარშვის ბოლო ეტაპზე დაუმატეთ მარილი და კარაქი. აზილეთ კარგად. მოაყარეთ გახეხილი ყველი და აურიეთ. ჩაუმატეთ სოიის სოუსი, არაჟანი და აურიეთ.
გააბრტყელეთ ცომი თხლად და ამოჭერით ცომიდან 10 სანტიმეტრის დიამეტრის წრეები. ცოტა კიდევ გააბრტყელეთ და თითოეულზე კოვზით დადეთ ყველისა და კარტოფილის შიგთავსი. შეკარით პელმენები და მოხარშეთ მდუღარე მარილიან წყალში 5-7 წუთის განმავლობაში.
მოასხით გამდნარი კარაქი და არაჟანი. გემრიელია ზეთში მოშუშულ ხახვთან ერთად.
სიახლეები ამავე კატეგორიიდან
