როგორ მოვამზადოთ ნიყვი, რომლის ფასიც ზოგჯერ 50 ლარსაც აჭარბებს
სოკო ნიყვი ბოლო დროს სოციალური ქსელის ვარსკვლავი გახდა. რატომ გაიხსნეს ის მაინც და მაინც წელს, ძნელი სათქმელია. თუმცა ნიყვი მართლაც უგემრიელესი სოკოა. საკმაოდ იშვიათად გვხვდება და ამიტომ მისი ფასი 50 ლარსაც აჭარბებს.
ნიყვი წიფლნარში და მუხნარში იზრდება. მისი სეზონი აგვისტო-სექტემბერია. ამოდის ნოტიოიან ფერდებზე და ხავსიან ბორცვაკებზე. ქუდი მოწითალო ფორთოხლისფერია, ფეხი ღია ყვითელი, ფეხზე აქვს გარშემორტყმული თხელი თეთრი ან მოყვითალო არშია. ძირში კი თეთრი თოფრაკია. ნიყვის ქუდის ზომა ზოგჯერ 25 სანტიმეტრს აღემატება.
იგი შედარებით უხვად მოიპოვება დასავლეთ საქართველოში. ბაღდათში, რაჭა-ლეჩხუმსა და ოკრიბაში. მიირთმევენ ძირითადად შემწვარს.
სავარაუდოდ, ნიყვის ასეთ გაპოპულარულებას მისი ქალაქის ბაზარზე გამოჩენაც მოჰყვება. თუ სადმე გადააწყდით, მის შეძენაზე უარს ნუ იტყვით. რა თქმა უნდა, მისი მომზადებაც უნდა იცოდეთ.
გთავაზობთ ნიყვის მომზადების რამდენიმე ხერხს, რომლებსაც შედარებით გამოცდილი ინტერნეტმომხმარებლები რამდენიმე დღეა ერთმანეთს უზიარებენ.
"ქათმის ხორცივითაა. ყველაზე მეტად კარაქი და შეწვა უხდება. დანარჩენი ვის როგორ უყვარს. პირადად მე ბევრნაირად მაქვს ნაცადი, ჩახოხბილიც კი მაქვს გაკეთებული და ვაღიარებ, შებრაწული კარაქით ყველაზე გემრიელია".
"გარეცხეთ, დააწყვეთ საცხობ ლანგარზე ამოტრიალებული ქუდებით, მოაყარეთ ცოტა მარილი და ღუმელში შეწვით. ასე გაიგებთ მის გემოს. დანარჩენი ყველაფერი ზედმეტია, კარგავს თავის გემოს".