ესპანეთის სასამართლომ ცნობილი კრიმინალური ავტორიტეტის, შაქრო კალაშოვის საქართველოში ექსტრადიციის გადაწყვეტილება მიიღო. ამის შესახებ "ინტერპრესნიუსს" საქართველოს მთავარ პროკურატურაში განუცხადეს.
მათი ინფორმაციით, მთავარ პროკურატურაში ესპანეთის სასამართლოს შესაბამისი გადაწყვეტილება უკვე მიიღეს. ესპანეთის სასამართლომ საქართველოს მთავარი პროკურატურის თხოვნა ექსტრადიციასთან დაკავშირებით დააკმაყოფილა. თუმცა, როგორც მთავარ პროკურატურაში განაცხადეს, კალაშოვს აღნიშნული გადაწყვეტილების გასაჩივრება შეუძლია.
კალაშოვი ესპანელმა სამართალდამცავებმა რამდენიმე თვის წინ საქართველოს სამართალდამცავების მოთხოვნის საფუძველზე დააკავეს. მას ბრალად უმსხვილესი ნარკოტრანზიტის კონტროლი ედება.