„მერსედეს-ბენცის“ ყველგანმავალ „გელენდევაგენის“ ყველაზე გამორჩეული ვერსია ექვსბორბლიანი G63 6x6-ია და მის შესაძლებლობებს ალბათ ძნელად თუ აჯობებს ამ მოდელის რომელიმე ვერსია. მაგრამ „ბრაბუსი“ სწორედ ამას აპირებს და შეიმუშავა 550 Adventure, რომელმაც თამასა კიდევ უფრო მაღლა უნდა ასწიოს.

• „ბრაბუსმა“ თავისი თავგადასავლების მაძიებელი პირველად ჟენევის ავტოშოუზე წარადგინა.

როგორც მოსალოდნლი იყო, მთავარი აქცენტი, ძრავის გაძლიერებაზე გაკეთდა. სტანდარტული 4.0-ლიტრიანი წყვილ ტურბოიანი V8, 416 ცხენის ძალიდან და 610 ნიუტონმეტრიდან, 542 ცხენის ძალამდე და 800 ნიუტონმეტრამდე გაძლიერდა.

► იხილეთ ფოტოგალრეა: ”ბრაბუსის” უახლესი და საუკეთესო მოდელები


„მერსედესის“ ავტომობილების ტიუნინგზე ორიენტირებული კომპანია ამბობს, რომ გაძლიერებული ძრავით ავტომობილს ადგილიდან 100-ის აკრეფა 6.7 წამში შეუძლია. ამ ავტომობილისთვის დამახასიათებელი ფორმების (და შესაბამისად, ცუდი აეროდინამიკის) და წონის (დაახლოებით სამ ტონას იწონის) გათვალისწინებით, ეს ძალიან სწრაფი აჩქარებაა. გარდა ამისა, ავტომობილის მაქსიმალური სიჩქარე საათში 210 კილომეტრს აღწევს.



ძრავის გარდა, „თავგადასავლების მაძიებელი“ ასევე გამოირჩევა გაძლიერებული ძირით, ჯალამბარით, ელექტრონიკით რეგულირებადი საკიდარით, დამატებითი განათებით, რომლის ელემენტებიც სახურავზე განლაგდა და ბევრი ისეთი რამით, რაც სტანდარტულ მოდელს არ აქვს და რაც შორეული, გრუნტიან გზებზე მოგზაურობისთვის შეიძლება დასჭირდეს ადამიანს.