გიორგი გველესიანი ირანის ჩემპიონი გახდა
ქართველი ცენტრალური მცველი, გიორგი გველესიანი "პერსეპოლისის" შემადგენლობაში ირანის ჩემპიონი გახდა.
32 წლის ფეხბურთელის გუნდმა 30 ჩატარებულ მატჩში 66 ქულა მოაგროვა და გველესიანის ყოფილ კლუბს, "სეპაჰანს" 1 ქულით აჯობა, რის შემდეგაც ერთი სეზონის ჩაგდების შემდეგ, მე-15 ჩემპიონობა იზეიმა. ირანის ყველაზე ტიტულოვანმა კლუბმა ბოლო შვიდ წელიწადში მეექვსედ მოახერხა ჩემპიონობის მოპოვება.
რაც შეეხება უშუალოდ გიორგი გველესიანს, მისთვის, ირანში გატარებულ 6 წელიწადში ეს პირველი ტიტული იყო - აქამდე ქართველი ფეხბურთელი "ზობ აჰანის", "ნასაის" და "სეპაჰანის" შემადგენლობაში თამაშობდა.
"დინამო თბილისის" ყოფილი კაპიტნის გუნდს კიდევ ერთი ტიტულის მოგების შესაძლებლობა აქვს - "პერსეპოლისი" თასის ნახევარფინალში იმყოფება და "ჰავადარს" დაუპირისპირდება. მატჩი 25 მაისს გაიმართება.
გიორგი გველესიანს მიმდინარე სეზონში ყველა ტურნირზე ჩატარებულ 31 მატჩში 9 გოლი აქვს გატანილი.