უჩა მამაცაშვილი საქართველოს პროკურატურას მიმართავს.
უჩა მამაცაშვილი ტელეკომპანია „იბერიასა“ და „ომეგა ჯგუფის“ ირგვლივ მიმდინარე პროცესებზე, „მისი სახელის საეჭვო და უკანონო გარიგებებში გამოყენებასთან დაკავშირებით“ გამოძიების დაწყებას ითხოვს.
„ლეგენდები ჩემი, ე.წ. ,,განსაკუთრებული გავლენების“ შესახებ არახალია და მას პერიოდულად თხზავენ ადამიანები, რომელთაც ამ ლეგენდის მეშვეობით უკანონო სარგებლის მიღება სურთ. გამონაკლისი, არც ,,ომეგა ჯგუფის“ ირგვლივ, ამ ბოლო დროს, მიმდინარე აჟიოტაჟია. ჩემთვის უცნობია, კონკრეტულ შემთხვევაში, საქმე გვაქვს ,,ომეგა ჯგუფის“ ხელმძღვანელების მხრიდან გამიზნულ პროვოკაციასთან, ყოფილი მაღალჩინოსნის არაჯანსაღ ინტერესებთან თუ სიყალბესთან. თუმცა, ყველა შემთხვევაში, ვიღაც აშკარად ცდილობდა ჩემი სახელის საეჭვო და უკანონო გარიგებებში გამოყენებას და ამ კამპანიას აშკარად პოლიტიკური ელფერი აქვს.
შესაბამისად, მივმართავ საქართველოს პროკურატურას, რათა დაუყოვნებლივ დაიწყოს გამოძიება აღნიშნულ ფაქტზე და ამომწურავი პასუხი გასცეს საზოგადოებაში გაჩენილ ლეგიტიმურ კითხვებს“, - ნათქვამია უჩა მამაცაშვილის განცხადებაში.
შეგახსენებთ, რომ სამაუწყებლო კომპანია რუსთავი2-მა აუდიო ჩანაწერი მოიპოვა, სადაც საქართველოს ყოფილი პრემიერ-მინისტრის, ბიძინა ივანიშვილის, დეიდაშვილი - უჩა მამაცაშვილი, ფიგურირებს.
სანდო წყაროს მტკიცებით, ერთმანეთს სპორტის ყოფილი მინისტრი და ომეგა ჯგუფის დამფუძნებელი ესაუბრება. ჩანაწერში ლევან ყიფიანი ადასტურებს, რომ ომეგა ჯგუფის პრობლემებს სწორედ მამაცაშვილი აგვარებდა, სანაცვლოდ კი 2 მილიონს ითხოვდა.
