CNN-მა გამოაქვეყნა ახალი სატელიტური ფოტოები, რომლებზეც ასახულია რუსეთის სამხედრო ძალების განლაგება ბელარუსში.
სამხედრო ძალების განლაგებას რუსეთი ბელარუსთან ერთობლივი წვრთნებით ხსნის, რომელიც 10 თებერვალს უნდა დაიწყოს. თუმცა, სატელიტური ფოტოები ცხაჰდყოფს, რომ საველე ბანაკები იქმნება უკრაინის საზღვრის სიახლოვეს, იმ ადგილიდან ასობით მილის მოშორებით, სადაც მინკსი და მოსკოვი ერთობლივ წვრთნებს მართავენ.
ფოტოები Maxar-ის მიერ შაბათს არის გადაღებული. ზოგიერთ ფოტოზე ასახულია ბელარუსის ბრესტის ოლქის ქალაქ ლუნინეცის აეროდრომი, სადაც განლაგებულია რუსული Su-25 ტიპის მოიერიშეები და S-400 საჰაერო თავდაცვის სისტემები.
ბელარუსის გომელის ოლქის ქალაქ რეჩიცაში თავმოყრილი რუსული ძალები
ბელარუსის გომელის ოლქის ქალაქ იელსკში თავმოყრილი რუსული ძალები
სამხედრო ანალიტიკოსების ვარაუდით, იელსკში შესაძლოა განლაგებული იყოს ისკანდერის სარაკეტო კომპლექსები
ბელარუსში რუსული ძალების მასშტაბური განლაგება შეშფოთებას იწვევს შეერთებულ შტატებსა და ევროპაში. ჩრდილოატლანტიკური ალიანსის გენერალური მდივნის, იენს სტოლტენბერგის განცხადებით, ბოლო დღეებში რუსეთმა ბელარუსში 30 000-ზე მეტი სამხედრო მოსამსახურე და თანამედროვე შეიარაღება გადასხა.
მისი თქმით, ეს არის მოსკოვის ყველაზე დიდი სამხედრო განლაგება ბელარუსში ცივი ომის დასრულების შემდეგ.
რუსეთ-ბელარუსის ერთობლივი წვრთნები "საკავშირო სიმტკიცე 2022"-ის დასკვნითი ეტაპი 10 თებერვალს დაიწყება და 10 დღეს გასტანს.
სამხედრო ანალიტიკოსები აცხადებენ, რომ მოსკოვის მიერ ბელარუსში დაგეგმილი ახალი სამხედრო წვრთნები, უკრაინისთვის ახალ საფრთხეს ქმნის. მათი თქმით, ბელარუსიდან რუსული ჯარები უკრაინის დედაქალაქ კიევთან უფრო ახლოს იქნებიან განლაგებულნი.
"საგარეო პოლიტიკის კვლევის ინსტიტუტის" სამხედრო ანალიტიკოსი რობ ლი "ამერიკის ხმასთან" ამბობს, რომ თუ რუსეთი ბელარუსში შორ მანძილზე მრავალჯერადი გაშვების სარაკეტო სისტემებს განათავსებს, კიევის მახლობლად სამიზნეებზე დარტყმას, უკრაინაში შეჭრის გარეშეც შეძლებს.
რუსეთი და ბელარუსი ერთობლივ სამხედრო წვრთნებს რეგულარულად მართავენ.
ბოლო მასშტაბური სწავლება "ზაპად 2021" სექტემბერში გაიმართა და მასში 200 000 სამხედრო მოსამსახურე, 80 თვითმფრინავი და ვერტმფრენი, 760 ერთეული სამხედრო ტექნიკა და 15 გემი მიიღებენ მონაწილეობდა.