კრებულში შესულია 2005 წელს ქართულ ლიტერატურულ პრესაში გამოქვეყნებული მოთხრობებიდან შერჩეული 15 საუკეთესო მოთხრობა. თითოეული მათგანი ამავე დროს არის ნომინანტი პრემიისა "წლის საუკეთესო მოთხრობა", რომელსაც "ბაკურ სულაკაურის გამომცემლობა" წელს უკვე მეორედ გადასცემს სამი საუკეთესო მოთხრობის ავტორს.
შემთხვევით ნაპოვნი და აქაურ პლატფორმამდე მოტანილი წიგნის ამბავი. არ ვიცი რისი ბრალია, რომ 2000-იანების დასაწყისში მოკლე მოთხობები არ იწერებოდა, თუ პრესამდე ვერ მიდიოდა, ფაქტია რომ ერთ-ერთი ყველაზე სუსტი კრებულია, რაც წამიკითხავს.
აკას მოთხობა ტიპური აკაა და მანდ ბევრი კომენტარის გაკეთება არაა საჭირო. ანა კორძია-სამადაშვილის მოთხრობა საკმაოდ პროგნოზირებადია, მაგრამ მაინც კარგად იკითხება. ხვედელიძის მოთხრობა მანამდე მქონდა წაკითხული და მეორედ ისე საინტერესო აღარ იყო, როგორც თავის დროზე...
ჩემთვის, ეს კრებულ კოტე ჯანდიერის "გლობალიზაციამ" გადაარჩინა, მასტერკლასია მოკლედ მოყვე ამბავი ისე, რომ ზუსტად წარმოიდგინო მთელი საუკუნე ერთი კონკრეტული ადამიანის, კონკრეტული სოფლის ჭრილიდან. ზედაპირული წარმოდგენით ვიცოდი რომ ეს მოთხრობა კარგი იყო, მაგრამ ასეთი კარგიც ნამდვილად არ მეგონა.