ლალი აფციაური შაქრო კალაშოვის საქართველოში ექსტრადიციას გამორიცხავს
ადვოკატი ლალი აფციაური ე.წ. კანონიერი ქურდის, შაქრო კალაშოვის ესპანეთიდან საქართველოში ექსტრადიციას გამორიცხავს.
როგორც "ინტერპრესნიუსს" ადვოკატმა განუცხადა, საერთაშორისო კონვენციები კრძალავს პირის მესამე ქვეყნისთვის გადაცემას. საქართველო კი მესამე ქვეყანაა, ვინაიდან კალაშოვის ექსტრადიცია უკვე მოხდა დუბაიდან ესპანეთში. ლალი აფციაურის ინფორმაციით, ამ დროისათვის ესპანეთის სასამართლოში ფულის გათეთრების საქმესთან დაკავშირებით კალაშოვის სასამართლო პროცესი მიმდინარეობს. მხოლოდ ამის შემდეგ შეიძლება მოხდეს ექსტრადიციასთან დაკავშირებით საქართველოს მოთხოვნის განხილვა.
"მანამდე ამ საკითხს ვერანაირად ვერ განიხილავენ. უნდა გაირკვეს, იქ აქვს თუ არა კალაშოვს დანაშაული ჩადენილი, რამდენად მძიმეა და ექვემდებარება თუ არა ექსტრადიციის საკითხის განხილვას”,-განაცხადა ლალი აფციაურმა.
საქართველოს იუსტიციის სამინისტრომ დაახლოებით ორი თვის წინ განაცხადა, რომ ესპანეთის ხელისუფლებამ დააკმაყოფილა საქართველოს მოთხოვნა კალაშოვის ექსტრადირებასთან დაკავშირებით და მხოლოდ ტექნიკური პროცედურებია მოსაგვარებელი.
იუსტიციის სამინისტროში ახლა კი აცხადებენ, რომ ამ საქმეში ახალი არაფერია და კომენტარს ვერ გააკეთებენ.
საქართველო კალაშოვის გადმოცემას საერთაშორისო ნარკოკარტელის საქმესთან დაკავშირებით ითხოვდა.
