(Da u ma M.M.Thaiang)
Ka Bible Convention bad ka jingduwai jingisnei jingblei ia kiba pang kiba shitom ba ar sngi ha Divine Mercy Retreat Centre Ladarymbai, Good Sherpherd Parish East Jaintia Hills ha kane ka 3 bad 4 tarik mynta u bnai (03+04/12/2022) ka la long ka jingmyntoi ia kito kiba wan sha kane ka Bible Convention bad ka jingpynkoit ia kiba pang naba kito kiba pang mynsiem ki ioh ia ka jingpynkoit pynkhiah lyngba ka Sakrament ka jingkylla kaba mut bad ki nongpang ha ka liang ka met katto katne ngut ki la ioh ia ka jingkoit jingkhiah na ki jingpang jong ki kaba la bat slem ia ki da ki snem kaba ki la pyrshang ban dih dawai na ki jaka ai dawai ki bapher bapher bad kiba dang kem pang ha kine ki khyndiat bnai bad sngi ba la dep.
Une u Nongthoh uba la iohlad ban wan iashim bynta ha kane ka Bible Convention, ha man la ka session ba u Phadar Antony Aluvassery.V.C, u pynlong ia ka jingduwai na ka bynta kiba pang bad hadien ka jingduwai u kylli na ki bapang da kaba ong “Kino kino kiba pang kiba sngew ba ki la ioh jingkoit jingkhiah sngewbha ieng lane rah kti” bad don na kiba pang ki la rah kti bad ieng na ki jaka shong jong ki bad da ki khmat kiba kmen bad phuh samrakhie ki thapkti bad ruwai iaroh ia U Blei ba lyngba ka jingduwai u Shakri jong U (Blei), u Phadar Antony Alussery V.C, U Blei U la sngap bad ki la ioh biang ia ka jingkoit jingkhiah na ki jingpang kibapher bapher kaba la bat ia ki da ki snem ia kaba ym shym la iarap da ki dawai na ki jaka sumar bad na ki dawai Kymbat (Kabiraij).
Ia kine kiba pang kiba la ioh biang ia ka jingkoit jingkhiah, une u Nongthoh u la iohlad ban ia kynduh bad ia kren ia ki katto katne ki Nongpang kiba la ioh biang ia ka jingkoit jingkhiah lyngba kane ka Bible Convention bad jingpynkoit ia kiba pang. Ki Nongpang kiba la ioh ia ka jingkoit jingkhiah ia kiba ym shym la kwah ban pynpaw kyrteng ha kane ka jingthoh, haba iathuh ha une u Nongthoh, don ki Nongpang kiba la pang la kumba 5/6 snem, kiba la dih dawai na ki jaka sumar ki bapher bapher hynrei kan shym la iarap bad da ka jingisnei jong U Blei da ka jingwan jong ki ha kane ka Bible Convention bad jingpynkoit ia kiba pang ki la ioh biang ia ka jingkoit jingkhiah. Don ruh ki Nongpang kiba la ioh ia ka jingkoit jingkhiah ha ki Bible Convention ha ki convention kiba la pynlong da kane ka Retreat Centre Ladrymbai ha ki snem kiba la leit noh kiba la ioh ia ka jingpynkoit na ki jingpang jong ki, kine ruh byllai ki la wan, wan iaroh ia U Blei bad iathuh ha une u Nongthoh ia ka jingioh biang jong ki ia ka jingkoit ka jingkhiah, ia ka jingmanbha man miat ha ka trei ka ktah, ha ka kha-I ka khaba bad kiwei de ki jingkyrkhu kiba ki la ioh ha ka ban bha ban miat ka longbriew man briew.
U Phadar Antony Aluvassery V.C. u Nongduwai uba kongsan ha kane ka Convention, u la pyllait ia ka por ba kordor jong u ban ia kren bad une u Nongthoh bad haba une u Nongthoh u la kylli lano pat phin wan biang sha Retreat Centre Ladrymbai? U Phadar Antony u ong ka por kam shah naba u hap leit na kawei ka jaka sha kawei ka jaka ban kyrpad ia U Blei bad ia ka jingisnei jong U (Blei) ban iarap ia ki briew kiba donkam ia ka jingiarap jong U Blei.
Une u Nongthoh u la iohlad ruh ban ia kren bad u Phadar Anthony Colenchery, Director ka Divine Mercy Retreat Centre Ladrymbai bad la ong wat lada ki Nongduwai jingpynkoit pynkhiah ia kiba pang kim lah ban wan kiba nabar ka jylla Meghalaya, hynrei pat man ka la ka sngi Saitjain jong ka taiew kiba kwah jingduwai ki don ki nongduwai ha kane ka Divine Mercy Retreat Centre Ladrymbai, East Jaintia Hills District, pynkut u Phadar Anthony Colenchery,Director ka Divine Mercy Retreat Centre Ladrymbai.
Kumban shu pynkynmaw ha kane ka 4 tarik ha shwa ban sdang ia ka jingduwai jingpynkoit pynkhiah ia kiba pang kiba ñiun la don ka Bible proseshon (procession) kaba la lamkhmat da ki nongshad ka shadtynrai (traditional dance), ka jingkren pdiang sngewbha ia baroh ki nongwan iashim bynta da ka kong Jobly Dkhar, ka jingruwai iaroh ia U Blei bad ia ka ktien jong U, nangta bud sa ka jingknia Mass Iukharist bakhuid, ka jingknia pan map iala ki lait ki let, ka jingpan jingkyrkhu kyrdoh bad ha ka juh ka por ka jingknia ainguh na ka bynta ki jingaiei kiba bun kiba u (Blei) U la ai. Ia ka jingknia Mass Iukharist bakhuid la lamkhmat da u Phadar Aibor Nangbah, Parish Priest ka Good Sherpherd Parish Ladrymbai u Nongknia Rangbah duh, ha ka jingiasynran lang bad kiwei de ki Phadar (Lyngdoh Sohblei) kiba wan na ki parish ba marjan.
Ha kane ka jingknia Mass Iukharist da ki spah ngut ki paidriewngeit ki la iashim bynta ha ka iabam ka iasip ia ka Iukharist Bakhuid kaba long ka Met bad ka Snam jong U Trai Jisu Khrist.