Ai  jingrwai u bah Charles, Bindo  bad kiwei 

Shillong, Nohprah 23: Ka Khasi Hills Autonomous District Council (KHADC) hynne ka sngi, ka la pynlong ia ka jingrakhe ia ka jingpdiang Khristmas bad ia u Snem Thymmai bad kane ka jingialeh kmen sngewbha ka la long kaba shongkun da ka jingiashim ki MDC na ka liang synshar bad liang pyrshah.  

Ha kane ka sngi lehkmen ia donlang u Myntri Rangbah ka jylla u Conrad K Sangma, u CEM ka KHADC u Bah Pyniaid Sing Syiem, u Chairman ka KHADC u Bah Lamphrang Blah, ki MDC, ki ophisar bad ki nongtrei jong ka KHADC.

 U MDC ka Mawhati u Bah Charles Marngar, u MDC shu sieh u Bah Bindo M Lanong ki la ai jingrwai kyrpang bad kumjuh ki MDC Liang Synshar bad Liang Pyrshah ki la kiew rynsan ban ia rwai lang ia ki jingrwai Krismas bad ieh sharud ia ka jingsngew party ne kam saiñ pyrthei.

 La pynphuh pynphieng ia kane ka jingrakhe lehkmen Khristmas da ka jingiashim bynta jong ki nongtrei ka KHADC naduh kiba heh haduh kiba rit, kiba la mih shakhmat ban ai ki jingrwai Khristmas bad la pynshongshit shuh shuh da ki kynhun rwai bapher bapher. 

 Ha shwa kane, u Myntri Rangbah ka jylla u Conrad K Sangma haba ai jingkren  ula ong, naduh ba u Bah Pyniaid Syiem ula shimti kum u CEM ka don ka jingiatreilang ba iajan hapdeng ka KHADC bad ka Sorkar Jylla bad ula iaroh ia u CEM bad ia ka Executive Committee ka jong u kiba la trei shitom ban phah ia ki jingtyrwa sha Delhi bad ka Council ka la ioh pdiang ruh ia kiba bun ki kam pynroi.

 U la iathuh ha ka jingialang, ba ka sorkar pdeng ka la dap da ka jingsngewtynnad ia ki jingtyrwa kiba la phah da ka KHADC bad ka sorkar jylla ruh ka la shimkhia lang halor kine ki jingtyrwa bad ula pynthikna ba ka Sorkar Jylla kan iatreilang bad ka KHADC na ka bynta ka bha ka miat jong ki paidbah.

U Myntri Rangbah ula ong ba kum kane ka jingrakhe ka dei ka sien kaba nyngkong kaba la pynlong da ka KHADC bad ka dei ruh ka sien kaba nyngkong ia u ban wan iashim bynta ha ka jingrakhe lehkmen Khristmas ba la pynlong da ka KHADC.