Shillong, Nohprah 16: Ka St Paul Higher Secondary School, Marbisu hynne ka sngi ka la pynlong ia ka jingiakynduh lang jong ki khynnah skul barim bad kiba mynta ne ka Annual Get Together ha phyllaw jong kane ka skul.

Ka jingthmu jong kane ka prokram ka long ban lum bad ban pyniakynduh lang ia baroh ki khynnah skul kiba rim bad kiba dang pule mynta bad ka long ruh kum ka lad ba kin ioh ban pynkhreh ia ka jingthmu ban pynlong ia ka jingrakhe jong ka jingdap 75 snem jong kane ka skul.

 Ia kane ka jingrakhe la plie da u Symbud Myntri Rangbah ka jylla u Bah Prestone Tynsong kum u kongsan ha kaba la iadonlang u Chief Executive Member ka KHADC u Bah Pyniaid Sing Syiem, u MLA ka Mawphlang u Bah MB Kurbah, u Chairman ka KHADC u Bah Lamphrang Blah, u Principal ka St Paul u Fr Jemeris Shylla bad kiwei kiwei.

 U Bah Prestone Tynsong haba ai jingkren ula ong, ba ka skul St Paul Marbisu ka la iaryngkat kyrdan bad ki skul kiba don ha ka nongbah Shillong bad ia kane la sakhi lyngba ka jingwan shakhmat kawei ka khynnah na kane ka skul ha ka eksam Matrik kaba la dep bad ula pynpaw ruh ia ka jingkmen ban tip ba ki bor pyniaid jong ka skul ki don ia ka jingthmu ban sdang noh ia ka Science Stream na ka bynta ki khynnah kiba pule ha ka Klas XII bad XII.

Ula kyntu ia ki khynnah skul ba kin minit ha ka jingpule ka jong ki khnang ba kin lah ban wan shakhmat ha ki eksam bad ba ki dei ban long ki khynnah ki ban wanrah nam bad burom ia ka skul bad ha kajuh ka por, ula kyntu ia ki kmie ki kpa ba ki dei ban don ia ka jingkitkhlieh ban pynnang pynstad ia la ki khun namar ka jingnang jingstad ka long kaba kordor bha.

U Bah Prestone ula pynbna ba ka sorkar jylla kan ai jingkyrshan da kaba iarap T.20 Lak ia ka Skul ba kan sdang ia ka Science Stream khnang ba kan long ka jingmyntoi bad jingkyrkhu ia ki khynnah pule ka thaiñ.

Ula ong kane ka skul ka long ba donbok bha namar ha ka prokram ba pynlong tang shikynta ka la ioh T.45 lak kynthup T.20 lak na ka Sorkar, T.20 Lak na ka KHADC bad T.5 Lak na u MLAka thaiñ.

 Ha shwa kane u CEM ka KHADC Bah Pyniaid Sing Syiem ula pynbna ba ka KHADC kan noh synniang T.20 Lak tyngka katba u MLA ka Mawphlang u Bah MB Kurbah ula pynbna ban ai T.5 Lak. 

Ia ka prokram la pyniphuh iphieng da ki jingrwai bad ki jingshad bad hadien la pynlong sa ia ka Concert kaba la iashim bynta da ki khynnah skul.