Shillong, Risaw 03 : Ka shi kol kaba u Terence Jyrwa u la thep ka la pynlong ia ka Maduh FC ba kan iohrah ia ka trophy ryngkat ka song pisa kaba 50,000 tyngka, hadien ba ka la lah ban pynliem ia ka Seng Samla Mawlai Phudmuri da kawei la nod (1-0) ha ka jingiakhun ia ka final jong ka Tur Shaphrang Football Knock Out Tournament 2023 ba la pyniaid da ka HYC Mawlai Umjaiur Unit ha madanheh mini stadium, Mawlai Phudmuri ha ka Lah sngi U Blei ka 2 tarik u Risaw, 2023.

      Ia kane ka shi kol u Terence u la thep ha ka minit bakhatduh jong ka kyllastep, kata ha ka 30 minit bad haba wanphai ha ka kyllamiet, ym don shuh kiba lah ban thep kol, watla ka Phudmuri ka la khun tyngeh ban ioh pyniakhaid hynrei kiei kiei baroh ki la pulom bad kim shym la.urlong kumba ki la buh thong bad khatduh ka Maduh FC ka la iohrah ia ka namlahduh kaba mynta u snem.

     Ha kane ka sngi la sam ruh ia ki khusnam shimet, ka nam

Best Goalkeeper ka la leit sha u Nister Roy Suting, ka nam best Player sha u Aibor Nongkhlaw bad ia ka nam Top Scorer la iohrah da u Terence Jyrwa, baroh kine ki dei na ka Maduh FC. Katba ia ka nam best Discipline Team la iohrah da ka Mawroh Boys FC.

Ha kane ka lympung iakhun ki la don baroh 32 tylli ki kynhun ba la poi ban iashim bynta.

      La pynlong ia kane ka lympung ialehkai phutbol ryngkat ka phangpdeng kaba ong EM ia u Drok bad HOOID ia ka Football.

      U president rangbah ka HYC Sengkmie u bah Robert Kharjahrin u la wan ban sakhi ia kane ka final kum u kongsan, ha ka jingdon ryngkat u bah Nikson Dohling, dkhot ba la shongthait ka HYC, bah Donbok Kharlyngdoh, vice president ka Sengkmie, bad President ka HYC Mawlai  Circle, u bah Emlang Sawian, bah F. Marpna, ki dkhot ka HYC Umjaiur unit, ki paidbah nongpeitkai bad kiwei kiwei.

       Haba ai jingkren kum u kongsan u bah Robert u la pynpaw ia ka jingsngewkhia halor ka jingshah hiar thma sop sop ka jaitbynriew ha ki bor kiba nabar ka jylla lyngba u jingdih basniew u Drok.

      U ong ba ki lah ban iakhun tyngeh ia une u jingdih basniew tang da kaba rai kut ban ong EM ia u Drok.